Tura, July 5, 2022: Garo Students’ Union (GSU) Western Zone (North) Dadenggre-ni President Tengsan Marak, batanggimin salrango Dadenggre C&RD Block-ko RTI ka•enba, 2013 bilsioni 2022 bilsiona SWRP, CRRP, CMSDP, ISDYP, IACDP scheme-rangni kamrangko baditana kingking ka•aha, uarangko aganchakchina RTI-ni niamo pangchake sing•doangaha.
“Anga Dadenggre C&RD Block-ni ning•a kosako janapgimin scheme-rangni bidingo RTI ka•aha, indiba uamangni aganchaka chu•ongjani gimin anga suk ong•jaha. Angni janapatgimin Scheme-rangni bidingo sing•anina uamang angna chu•onga gita aganchakjaha. Uni gimin chinga uamangni aganchakanirang baditana kingking kakket ong•a uko ma•sina gita, ia obostako State Chief Information Commissioner-ona ra•doanggen” ine parakataha.
A•dok chigako sildap namdapatna sorkarini on•atenggipa scheme-rangko Dadenggre elekka-ni pilak manderangna apsan suale kamko on•na nanga. MLA-ni on•enggipa scheme-rangko doltangrarana suale on•na nangja. Scheme-rangko pilakan man•na nanga, ua scheme-rangko doltangni manderangnasan sualaniara jinmana gimaani ong•a ineba Tengsan Marak janapataha.