Ampati, Aug 8, 2022:Garo Hills-ni bang•a NGO-rang, Bangladesh a•songchina walanti, salanti ro•ong salruraenggipa dumper garirang ramram manderangko saldape manderangni janggirangko gimaatengani gimin jegale jingjengatanirangko dake badi ka•ahaoba manigija ro•ong salani a•sel Robibar attamni 6:30 bajimango motor bikeo re•baenggipa sakgni manderangko salgake saknaataha ine kobor man•soaha.
AHAM, South Western Zone, Ampati-ni General Secretary Wester G.Sangma-ni u•iatani gitade, Bangladesh-ona ro•ong salangenggipa dumper gari, South West Garo Hills a•jani ning•o donggipa Chapahati Bidukora songo sakgni manderangko Robibar attamni 6:30 bajimango salpake katangaha.
Indakgipa a•selrang changni chang South West Garo Hills, Dalu aro Purakasia jolrango ong•engon, sorkari aro pulis department ro•ong salenggipa manderangni kosako maming ja•ku de•anirangko dakkuja aro janggi gimagipa nokdangni manderangna sorkari compensation-rangko on•kuja ineba parakataha.
Robibar attamo sakgni manderangko salpake katanggipa Dumper garini driver-ko rim•sochina pulisrangna kobor on•atahachim, indiba pulisrang dumper garini driver-ko rim•rikna man•jaha ine u•iataha.
Dumper gari salpake saknaa man•gipa manderanga Chibongbinggre Aragittim songni Nokma depante Sansing R Marak aro Demdemakona songni Sengra A Sangma ong•achim. Uamang sakgni kam nangani gimin Bonbanga songchi re•ange songtangona re•bapilmiting somoio indakgipa a•sel ong•aha. Indake a•sel ong•anio saknaa man•gipa manderangko Robibar walon saksako Ampati Civil Hospital-o sanna gita ra•angaha aro bilongbate mata buako man•gipa sakgipinko Tura, Holy Cross Hospital-o sanna gita watatskaha ineba u•iataha.