Tura, Sept 25, 2022: Phulbari Pulis Station aro Dadenggre Sub Division-ni ning•o donggipa Rongsak bajaro Chu dokkan kuliani, chu palsrukani aro tas joa kal•ani a•sel adita kajia golmal ong•aniko Rongsak jolni ma•gipa pagiparang jegale bajar antio chu palaniko aro tas joa kal•aniko champengataniko dake on•china Pulis, Civil SDO, Excise department aro NGO-rangna kobor on•ataha.
Indake Rongsak jolni ma•gipa pagiparangni okamatako man•ne, GSU Phulbari Regional Unit, GSU Rajabala Unit, FKJGP Balachanda Circle, Pulis, Dadenggre Civil SDO aro Excise Department-ni Inspector Sonibar salo Rongsak bajarona re•angenba agan-ku•pattie on•angaha ine koborna u•iataha.
GSU Phulbari Regional Unit-ni Secretary Pangsrang A.Sangma-ni agan-talatangani gitade, skangonin Rongsak bajaro tas kal•na, chu palna man•jawa ine dongimin niam donga ine parakangaha. Unbaksana chu dokkan ba wine store-ko kulina gita songni nokni manderang, NGO-rango maming sing•a gri skatang kulina man•ja. Indiba bajar committee-ni soiko ra•sruke, Sindapara Nokma saksani NOC-ko ra•e, License tarie chu palna chanchiachim, ia obostako darangba ma•sija, indiba ma•gipa dolrang bajar antio chu dokkan kulie chu palani aro tas joa kal•aniara, dal•drobaenggipa chadamberangna namchongmotja ine parakatenba GSU Phulbari Regional Unit-ni Secretary Pangsrang Sangma-na badi ka•ataha ineba aganangaha.
Uni gimin mikkangchi songo noko ba bajar antio niam gri chu palna aro tas joa kal•na nangja aro Licence gri skatang chuko palna man•ja ine GSU dilgipa mikkrakataniko on•angaha.
Unbaksana, FKJGP Rajabala Circle-ni President Samsen M. Sangma-ba bajar antio chu palanira namchongmotja aro poraienggipa chadamberangko namgija ramaona sokata, uni gimin songo noko churangko palna nangja ine didiangenba niam gri bajar antio aro songo noko chu palaniko aro joa kal•aniko dontongchina didiangaha.
Indake bajar antio niam gri chu palaniko champengatna ta•raken rakgipa niamrangko tarie SP, Civil SDO, Pulis, Nokma aro NGO-rangna sokatchina GSU dilgipa didiangaha. Uni gisepon saoba niamni kosako re•ode aro niamko pe•ode, niam gita sastiko on•ne dai gamna nanggen ineba parakataha.