Rongram-o a•sel ong•ani bidingo Dr Jimmy-ni jikgipa talata 

0

Tura, Mar 24, 2023: Re•anggipa March 13 tarik attamo Rongram dollong sambao donggipa Highway soroksamo be•en, na•tok aro me•surangko palenggipa bajaroniko tangka gildrae ra•enga ine matnangenba Dr Jimmy Carter Sangma-ko manderang chadrape dokgrimani bidingo uni jikgipa Ma Rongsri Sangma songbad setimgiparangna agan talataha.

Ma Sangma-ni talatani gitade, ua biap ba a•ade Nokmani a•a ong•ja, PWD-ni watgalgimin highway-ni a•asa ong•a. Ua biapara Horticulture-ni a•a ong•a, skangde Agriculture-nichim, indiba da•osa Horticulture department ong•kata. Uni gisepon, PWD je a•akon watbahachim, uko Horticulture ba Agriculture-na on•ani bidingo memorandum ge•gni Secretariat level-oni donga. Ua a•ako galbaani ja•mano ua biapde sera bera jabolrangko galachim. Uni gisepon, indin gale donengani gimin angni segipa Nokmao sing•eaha. Unon Nokmade angni a•a ong•ja ine aganchakaha, indiba na•a document on•na man•genma ine sing•on, hajal 60 ko ra•e, angni segipana document on•ani gisepon, Nokma document-o pangchake angni segipa a•a Patta tariaha.

Ia obostade, 2007 bilsirangon ong•aha, indake 2007 bilsio Nokmani document on•gipa angni segipao donga ine Ma Sangma aganaha. Indake ua namgijagipa biapko ba a•ako tarie hajalni hajal, lakni lak koros bon•aha, uni ja•mansa da•o a•arang apsan ong•aha. Jensalo a•arang apsan dake plain ong•aha, Nokmani dolrang aro Nokmani chawari Chichang minggipa aro gipin bajar committee-rang, chingni a•ana mikboke angni segipako dos galdrake jinma ku•monge dokgrimaha.

Indiba angni segipa ua salo tangka gilna re•angja, uano kam ka•atako nina gitasa re•angachim. Ua somoio angni segipa nokchi re•bapilna gari start ka•ahaon, ua bajaro me•su palgipa me•chik saksa Rupali minggipa aro uni manderang jinma re•bae, angni segipako tangka gilgipa ine garioniko salongkate dokaha. Indake uamang jinma do•o palgipa masangchi ga•chepchep su•chepchepe dokaha. Uni giminsa angni segipa an•tangko naljokatna, do•o den•gipa atteko do•o palgipaoniko ra•seke, attechi den•dingdingaha, indiba saksakoba atte nangjaha. Uni ja•mano uamang ang segipako ki•sangchini sikgrope doktaiaha. Unomitting Nokmani chawari Chichang minggipa, re•bae dokchina ge•etaha. Indiba angni segipa manderang jinmaoni jenten joke Rongram Out Post-chi katangaha, unon pulis saksa angni segipako jokatna gita kuturi ge•sao donuaha. Indiba bang•a manderang chrike, Rongram Outpost-ona re•bae angni segipako so•otna outpost-ko changdulaha. Indake kontagni mangna darangba dakchakna re•bajaha. Uni gisepon Ronrangram-ni I/C jean Ever Christone Ch.Sangma ong•achim, ua I/C angni segipako jokatani pal batesa kate chakaha. Uano a•sel ong•na skang manderang kajia a•bote chadrapani gimin call ka•atachim, indiba I/C, na•an ong•gija dakenggen, angade a•palosa ine phone switch off ka•e kataha.

Uni ja•mano angni segipa Rongram outpost-o saksa pulisni dakchakachi kuturi noksiko dongnue chakaha, indiba jensalo manderang jinma re•bae, outpost-ni do•gako dokdrakna am•enba angni segipako wakni pal den•gitakgen ine outpost-ni a•palo chrikaha. Unomiting tiktako Jengal Thana-ni

I/C, Bamon-sa indita manderangni changdulmittingo angni segipako saldrake, an•tangni gypsy-ona gipake ra•baenba gypsy-o chipkete, jenten manderangoniko jokataha.

Indake, Bamon angni segipako Goeragre-ona rimbae, safety ong•aignok ine an•tangde dongrike, Tura Thana-ona joljol watataha.Jensalo angni segipa Tura thana-ona sokbae FIR ka•na am•on, saksa kni kochirong dakgipa Tura thana-ni gnigipa OC, FIR ka•na on•jaha. “Nangkode attempt to murder aro extortion case-o pangchake, FIR ka•manjok na•ade dos dakgipasajok” ine aganne angni segipako rim•e lockup-o chipaha, angni segipana FIR ka•na chol on•jaha ine Dr Jimmy-ni jikgipa suk ong•gijaniko parakataha.

“Anga indakeba janapatna sikenga, jensalo mandena a•sel ong•a, pangnan songbad segiparang dolsakosan galone seronga. Indake ong•ode, saksan angni segipasan dos dakgipa ine mandeskana galone sena man•ode, manderang jinma iasan dosi dakaigipa ine dokgrime janggi bon•aona sokgenchimoba, ia mandeni dosisa ine case-ko bon•ataigenma? Ian a•songna on•gimin niam ong•ama? Ia sing•ani darang mandeni gisikona nabachina. Beben da•alo angni segipana mamingba ong•jaha, indiba mande dosi ong•aha ine chanchipe, manderang dokgake siatahaode uamangara dosi ong•jawachim-ma? Pulisrangni kamde, dosi donggipa mandekoba jinmani jakchi dokgaka man•ne, sichina ingipa niam banoba dongama” ine Dr Jimmy-ni jikgipa sing•doangaha.

Leave A Reply

Your email address will not be published.