Tura, March 15, 2023: Meghalaya a•dokni Rashtriya Madhyamik Shiksha Abhiyan (RMSA) skulo skigiparang a•dokni gital Education Minister Rakkam Sangma-ko Monggolbar salo gronge, uamangni dormako bariatchina mol•molangaha.
RMSA-ni seanggipa memorandum-o janapatani gitade, skigiparangni man•na nanggnirangko somoi gita on•china mol•mole seaha.
“RMSA skulo skigiparang ja 6-na kingking dormaharangko man•jani a•selo chinga bang•a neng•nikanirangko chagrongna gita nangenga. Una agreba chingni dormaharang adita ru•uta bilsirangna maming dakeba baridapkujaenga” ine RMSA Teachers Association-ni Secretary Rikchi N Sangma aganaha.
“Chinga RMSA-ni skigiparang chu•onga gita aro somoi gita dormaharangko man•jagenchimoba, chinga a•dokni education ba skia poraiani gadangko tang•doatna rakbee kamrangko ka•enga. Chinga gipin skigiparang gita Medical allowance, gratuity aro pension-rangba dongpaja. Uasan ong•aigija Contributory Provident Fund (CPF)-ba dongja. Uni gimin chinga RMSA skulo skigiparangni neng•nikanirangko aro nangnikarangko chu•sokate on•pachina Education Minister Rakkam Sangma-ko mol•molangaha” ine koborna u•iataha.