Rimpu Baganoniko pulisrangni rim•anggipa chadamberangoni disable me•chik saksako pattokoniko watkuja 

Tura, Aug 25, 2022:Re•anggipa July 22 tarik attamni 6:30 bajimango West Garo Hills a•jani pulisrang Edenbari-o donggipa Rimpu Bagan (RB)-ko chadrape am•sandianiko dakenba uano rona re•anggipa dos gri chadamberangko rim•e pattoko donne, kal•steke roenga ine duko ga•akenggipa chadamberang aganaha.

Rimpu Bagan-o bang•a manderang cha•ani cha•e rona, mitamrang biap nina gitasa re•angachim, indiba pulisrang RB-o kusi ong•e roenggipa manderangko ong•gija chanchichipe chadamberangko dos galdrake kal•ake roenga. Pulisrang RB-ko ‘brothel’ ba me•chikrangko pale cha•ram biap dake jakkaleng ine chanchichipenba, uano rona re•anggipa manderangko rim•e dos gri chadamberangko pattoko donne, namgija bimingko man•atenga. Indake Tura-ni SP Vivekanand Singh Rathore, A•chikrangko kal•ake roenga.

Rim•a man•gipa me•chik chadamberangko pulisrang, ku•atogija kattarangko aganne, “kontaprako me•asa saksana badita gong tangkana palenga, changprakna me•asa sakprakoniko badita tangkarangko ra•enga, walo badita sak me•asarangming roenga aro walgimiko badita tangkana palenga” ine sing•aniko dakenga, uko ku•rachakjaode na•songni jamin (bail)-ko ra•galpilgen ine ka•mikkenatenga ine duko ga•akgipa chadamberang kobor ra•timgiparangna aganaha.

Indake ong•gija aro ku•togija kattarangko sing•aniara chadamberangko namgija kamo galone sasti on•na miksonganisan ong•aia, “Chinga indakgipa biap ine RB-ko ma•sija aro indakgipa kamrangko ka•enga ine ma•sijaode aro chinga indake janggi tanggiparang ong•jani gimin, chinga pulisrangna tol•e ku•rachakgenma. Chinga kusi ong•e ronasa RB-ona re•anga denggu dake rona re•angja. Pulisrang niamni kosako kamko ka•e Chingni janggi tanganiko cha•sotenga ong•jama. Pulisrang RB-ko chadrapani somoio chingko nike bimingrang seate, photorang ka•e ra•ani ja•mano ching baksa coperate ka•bo ine aganani gimin chinga coperate ka•a, na•song maming ong•jawa watatpilaigen ine aganaha, indake chingko wal tong•sa RB-o chadengate donenba walni 1 bajirango thana rimange, medical checkup ka•ani ja•mano cha•a ringa gri thana building kosako jinmako sasti on•ne donaha. Chinga janggi tanga gimik indakgipa obostako chagrongkujachim, ian skanggipa ong•aha” ine duko ga•akgipa chadamberang aganaha.

RB-o rogipa manderangko pulisrang rim•ange, pattoko donatgipa adita adita sakde jokaha, indiba chadambe me•chik saksa jean ku•sik sokmangija aro srange aganna man•jachim, ua me•chikko me•chik pulis officer incharge (IO) Mamta Hajong thanao changni chang sing•taitaie, ua me•chikni Ku•sik Sokmangija aganani gimin ka•dingsteke aro chonnike roenga. Unbaksana jailona sokangon, jailni me•chik warden-ni sing•anioba ku•sik sokmangija aganani gimin, indakgipa manderang denggu dakenga ine bil•gni satkapaha ine uni ripengskarang aganaha. Indake ua me•chikko dos galdrake da•onaba pattokoniko watpilkuja.

Indake dos grigipa chadamberangko pulisrang changni chang sing•taitai sasti on•ne rongenga. Human Rights Commission (HRC)-ni niamo pangchake pulisrang maming saloba Disable mandeko kal•ake aro sasti on•ne rona man•ja ine Civil Society Women Organisation (CSWO)-ni dilgiparang aganaha.

Ua me•chik poraianio gisik matsramgipa ong•achim aro ua Philosophy Honours-ko dake Graduate ong•aha. Indiba ua Disarthrea sabisiko man•ani a•sel, ‘Ku•sik agananio kattako Srange aro Rongtale’ aganna gita man•jachim, indaken ua Doctor-ni ‘Disability Certificate’-koba man•aha. Unbaksana ua re•anggipa 2021 bilsini November 19 tariko Skotong Minister Conrad Sangma-ni Tura Dakkopgre Training Centre-o a•bachengate on•anggipa, Deen Dayal Upadhyaya (DDU)-Grameen Kaushalya Yojana (GKY), Empowering India, Empowering the World-Universal Sewa Samiti programo bakko ra•e Skill Trainingko matchotani ja•mano Chennai-ona watatako man•ne 2022 bilsini April 17 tariko Tura-oni re•chakatangaha, indake 2022-ni June 16 tariko Tura-ona re•bapilaha me•chikni pagipa aganaha.

West Garo Hills pulisrang, Human Rights Commission-ni niamko pe•e dos gri chadamberangko namgijagipa kamo galone, namgija bimingko man•ataniara pulisrangni chanchisokgijagipa kam ong•a. Unbaksana chadamberangni mikkangchi name janggi tanggniko nosto ka•e galani kamsa ong•enga ineba CSWO-ni dilgiparang matnangataha.