Shillong, Mar 6, 2023: A•doko NPP-ni sak 26 MLA-rang baksa, BJP MLA sak 2, HSPDP MLA sak 2 aro Independent MLA-rang sak 2 baksa chaprime gital sorkariko rikgen ine parakataha.
HSPDP-ni MLA sak 2 NPP-na support ka•ani gimin, HYC jegale so•sojengjeng jingjengataniko dakgenchimoba, konta 36-na skangan, Regional Party-rang UDP-ni dilachi NPP aro BJP-na chu•gimik chakpaaniko on•anichi, NPP-ni National President Pa Conrad K. Sangma a•dokni 13-gipa Skotong Miniater ong•e, Monggolbar salo ku•mikchetgen.
Robibar attamni 6 bajimango, UDP-ni Vice President, AF Dkhar aro gipin MLA-rang baksa Conrad Sangma-na chakpae segipa chittiko on•eaha.
Uni gisepon, UDP aro PDF dolgni NPP-na chakpaani kakket ong•a ine NPP-ni National President Conrad Sangma dingtang dingtang songbad-rang aro Social Media-rango apsan jachipchange de•e mesokataha.
Indake ong•engon, PDF dilgiparang Sonibar attamo Skotong Minister-ni nokona re•ange, NPP-na chakpae segipa chittiko on•eaha. Unbaksana HSPDP-ni sak 2 MLA-rangba NPP aro BJP-na chakpaaniko ra•galpilgija dongaiaha ineba u•iataha.
NGO-rang, Meghalaya-o “Khasi Chief Minister” ong•na nanga ine ku•rang on•genchimoba, UDP Sonibar attamon NPP aro BJP-na chakpana sikaniko parakataha.
Indake bon•kamao Regional Party-rang gital sorkariko rikenggipa dolo bakrimeaha.
Koborni gitade, UDP-ni sak 3 MLA-rangna Cabinet Berth-rangko on•gen. Uandake PDF aro HSPDP-ni MLA sakprakna cabinet berth-ko on•gen. Apsandake BJP-ni MLA saksanana cabinet berth-ko on•gen, indiba skang gita ja•mano cabinet berth-ko jujaattaigen ine parakataha.
Koborni gitade, NPP-ni sak 5 MLA-rang cabinet berth-ko man•gen aro Skotong Minister-ni Post-ko Conrad Sangma an•tangna a•kangenga.
Indake Conrad Sangma gnigipa changna Meghalaya a•dokni Skotong Miniater ong•e redilanggen.
Da•o NPP-ni a•tipo chaprimegipa chu•gimik sak 45 MLA-ranga NPP-ni sak 26 MLA-rangko man•chape, UDP sak 11, BJP sak 2, HSPDP sak 2, PDF sak 2 aro Independent sak 2.
Warachakenggipa dolni sak 14 MLA-ranga TMC sak 5, Congress sak 5-ko man•chape, Voice of the People’s Party (VPP) sak 4-san ong•aiaha.