Re•anggipa 2013 bilsio abisa sakgniko drae til•ekgipa pulis officer-ko sasti on•china POCSO rai on•a

Shillong, March 25, 2022: South West Garo Hills a•jao re•anggipa 2013 bilsini March jao Ampati Pulis Station-ni officer in-charge bilsi chu•onggijagipa abisa sakgniko kragija til•ekdraani bidingo POCSO court Bristibar salo dosi dakaha ine raiko on•aha.
Indake dosi dakgipa mandena maidakgipa sastiko on•gen Sukrobar salo parakatgen ineba u•iataha.

Dosi dakgipa Nurul Islam kragija abisa sakgniko drae til•ekani somoio Ampati Pulis Station-ni officer in-charge ong•engachim.
Indake duko ga•akgipa abisa sakgnini pagipa pulis officer-ni kosako badi ka•ani ja•mano ua mamlani bidingo ning•tubate sing•sandianiko dakna gita ua mamlako East Khasi Hills a•jaona ra•angaha.
Nurul Islam-ni kosako badi ka•ani gitade, bilsi 14 ong•gipa me•chikko 2013 bilsini March 13 aro 14 tarikrango changni chang Ampati pulis station nokdringon drae til•ekahachim.

Uni ja•mano 2013 bilsini March 17 tariko bilsi 17 ong•gipa me•chikni abitangko drae til•ekskaha.
Ua mamlani bidingo POCSO court sandianiko dake bilsi 9-ni ja•man Nurul Islam dosi dakchong•motaha ine sakkiko man•ani ja•mano, Nurul Islam POCSO-ni niam gita sastiko man•na krachong•mota ine parakataha.