Ampati, June 14, 2022: Rangsakona Mothers’ Union aro AHAM South Western Zone, Ampati baksa bakrime dingtang dingtang miksonganirangko ra•e, Rangsakona Higher Secondary Skulo Awareness Program-ko Sombar salo ong•atangaha.
Ia Awareness Program-o ming 5 subject-rang ba miksonganirangko donne, jekai Human Trafficking ba mande badingsrukani, Early Marriage ba Senggnang bia ka•ni, Mental Health Problem, gisikni gita neng•nikani, mobile phone jakkalanio Advantages aro Disadvantages ong•ani, Social Media aro pekgipa ringanirangko jakkalni ba drugs abuse-ni bidingo Theme, Learn for Change Yourself, nisanko donne program-ko ong•atangaha.
Ia program-ko ong•atanio Rangsakona-ni MLA, Pa Zenith M.Sangma mongsonggipa sokgipa ong•e bakko ra•angaha. Zenith Sangma jinmana aganprakengon, seng•aniko skie ra•enggipa chatro chatrirangna aro tom•bagipa sakantina donsogimin subject-rango pangchake agan talatangaha.
Unbaksana, South West Garo Hills-ni Additional Deputy Commissioner, Ma AV D.Shira-ba dongpae, Early Marriage ba Senggnang jikgipa segipa ra•e bia ka•ani aro Mental Health Problem ba gisikni gita neng•nikani bidingo chadamberangna nambee agan talate on•angskaha. Una agreba Ampati Pulis Station-ni Me•chik pulis Winji G.Momin Human Trafficking ba da•ororro mande badingsrukani gimin agan talatangaha. Indake Mobile Phone jakkalaniara mai advantages aro disadvantage ong•achim, Social Media-ko maikai jakkalna nanga aro Pekgipa ringanirangko jakkalanichi (Drugs Abuse) mandena mai namgijaniko ra•baachim, Ampati Baptist Mondolini Pamong aro Krima No.6-ni Executive Secretary Wepster G.Sangma chadamberangna skie on•angaha. Una agreba Garobadha PHC-ni Dr Balnamchi A.Sangma-ba Drugs Abuse subject-ko ra•e, chadamberangna nambee skiangaha.
Indake ia program-o Ampati Baptist Mondolini pamong Ma Sengji K.Sangma aro Rangsakona Higher Secondary Skul, Bidan Bisik English Skul aro Jalluagre SSA Skulni chatro chatro chatrirang sak 700-na bakko ra•angtokaha ine AHAM South Western Zone, Ampati-ni General Secretary Wester G.Sangma u•iataha.