Psychologist candidate-rangko Counsellor-ni kamna interview ra•na on•gija watatpila
Tura, April 6, 2023: National Health Mission (NHM)-ni palo, West Garo Hills, District Health Society (DHS), Tura re•anggipa March 24 tariko Medical Health Department-ni dingtang dingtang kamrangna Advertisement ka•e, gisiko nanggipa candidate-rang, an•tangtangni poraia gadangni kri dorgastorangko galna man•gen ine parakataha.
Indake ia kamrangna Advertisement on•gipani serial number 8-gipao ARSH Counsellor (RKSK)-ni kamna Selsella CHC aro Asanang PHC-o Post ge 2-ko parakataha. Ia kamna ba Post-na galenggipa candidate-rangni poraia gadang MA in Social Science or Bachelor Degree in Communication or BSW-ko pass ka•gipa ong•na nanggen ine janapataha.
Ia Advertisement-ko nike Psychology Degree pass ka•gipa adita sak candidate-rang, dogasto galaha. Maina uamangni Psychology Degree-ko poraianio Consellor-ni pilak dingtang dingtang chapter-rangko poraie pass ka•giparang ong•achim aro Consellor-ni kamna skie ra•ahani gimin, uamang ma•siesa ua kamna dorgastoko galahachim.
Indiba DHS-ni Advertisement ka•anio janapatani gitade, Psychology Degree pass ka•giparangko janapa dongjachim.
Indake ong•genchimoba, Psychology Degree pass ka•gipa candidate-rang, uamangni poraianio dingtang dingtang mandeni bewalrang maidake ong•baa, bi•sa chonaoni dal•aona, mandeni bidingo skie ra•gimin ong•achim aro DHS-ni advertisement ka•gipa Counsellor-ni kamara Psychology Degree-ko janapa dongjaoba, chu•gimik kaman Psychologist-rangni skie ra•gimin ong•achim ine aganaha.
Indake Counsellor-ni kamna dorgasto galgipa adita sak Psychology candidate-rang, re•anggipa April 4 traiko Tura-ni DM&HO Office-ona interview ra•na gita re•angaha, indiba DM&HO uamangko interview ra•na on•gija watatpilaha. DM&HO-ni uamangna aganatani gitade, “Director na•songko interview ra•na beng•ataha, maina ia kamara Psychology Degree-ni Criteria ong•ja, Social Science ba Sociology Degree pass ka•giparangni kamsa ong•a” ine watatpilaha.
Mai miksonganio Health Department-ni Director, Psychology poraigiparangko interview ra•na on•jaha, ma•sina man•jaha. Indiba “Chingni chanchiani gitade, Director aro Meghalaya sorkari maiba donmitapani katta dongna nanga.Maini gimin Meghalaya sorkari Psychology Degree pass ka•giparangna ia kamko on•na sikjaha. India-ni bang•a a•dokrangon, Psychologist-rangna Counsellor-ni kamko on•enga, indide Meghalaya-o maina on•skajenga. Chinga Meghalaya-ni a•palosa Psychology Degree-na poraie matchotaha aro chingni koros bon•ne poraiani maming namgnina dongja. Meghalaya sorkari Psychologist-rangko dal•e ra•ja aro iandakgipa kamrango chingna on•jani a•selara maiba neng•nikani dongama? Maina chingko interview ra•na on•gija watatpilaha” ine Psychology candidate-rang sing•atenba suk ong•gijaniko parakataha.