New Delhi, June 23,2022: BJP-chi chalaienggipa National Democratic Allience (NDA) sorkari re•baenggipa India a•songni Presidential Candidate-na Orissa a•dokni tribal Me•chikma Draupadi Murmu-ko biming mingaha ine re•anggipa Monggolbar salo Rajya Sabha-ni BJP membor J.P Nadda Press Conference-o parakataha.
Orissa a•dokni Tribal dilgipa Draupadi Murmu Jharkhand a•dokni gitcham Governor ong•achim. Uko President seokode, uan tribalrangoni skanggipa aro me•chikrangoni gnigipa, India a•songni President ong•gen ine parakaha.
Ia chango BJP party Tribal candidate-ko Presidential eleksin-na biming mingahani gimin namen rasong chabeani ong•a. Batanggipa Presidential candidate ong•e, Lok Sabha-ni gitcham Speaker, Purno A•gitok Sangma sagi tribalrangoni skanggipa changna Presidential candidate ong•e susaahachim, indiba rasong gribee chena gita man•jaha. Indake ia chango tribalrangoni gnigipa changna Presidential candidate ong•e susaani ong•enga.
Ia chango Presidential candidate-na tribal me•chik Draupadi Murmu-ko biming mingahani gimin, Meghalaya a•dokni Skotong Minister Conrad Sangma kusi ong•e, Indiani Prime Minister Narendra Modi-ko gisik ka•tong gimikchi demittelataha.
“An•chingni India a•songo changsaode tribal President ong•gen ine angni pagipa, PA Sangma sagini agananggipa jumang chu•sokaha” ine Conrad Sangma parakatenba, Presidential Candidate-na nama sikaniko on•ataha.
Indake ong•engon, warachakenggipa dolni TMC MP aro National TMC-ni gitcham Vice-President, Yashwant Sinha-ko Presidential Candidate-na biming mingskaha. Skanggipa tribal Presidential Candidature PA Sangma sagi-na Mamata Banerjee chakpaaniko on•jaha, da•o gnigipa changoba tribal Presidential Candidature Draupadi Murmu-naba chakpaaniko on•jaenga.
Da•o Meghalaya a•dokni TMC MLA-rang tribal Presidential Candidate-na chakpagenma, ma doltangni TMC Candidate Yashwant Sinha-na chakskagen ine sing•doangaha.