Shillong, October 26, 2022: West Khasi Hills a•jani ning•o donggipa Patharkhnang songni buringo mande saksani manggisiko man•aha ine pulisrang koborna u•iataha.
Pulisni u•iatani gitade, sianggipa mandeko pistol-chi goe so•otaha. Sianggipa mandeara Sienduli songni bilsi 40 ong•gipa Prestarius Thongni ong•ahachim.
Koborna parakatani gitade, sianggipa uni ripengskarang baksa do•o goramna buringchi re•angaha. Indake attamni 4:30 bajimango ua so•otako man•ne janggitangko gimaataha.
Ia obostani bidingo sianggipani pagipa Mawshynrut Pulis Station-o badi ka•aha.
Pulisrang ia obostani bidingo talbate ma•sina sing•sandianiko dakenga ineba u•iataha.