Shillong, Feb 5, 2023: NPP-ni miksongani aro chu•sokaniko ra•bana, re•baenggipa bilsi 5-na name chanchisamsoanio pangchaka ine NPP parakataha.
Da•alo National People’s Party-ni miksonganirangko parakatengon, NPP People’s Document, Vision 2023-28-ona donachim. NPP-ni National President Conrad Sangma “Report Card to the People” ingipa lekkako manderangna January 12 tariko oprake on•aha, jeon NPP-ni dilenggipa MDA sorkari 2018 election-ni somoio ku•chakanirangko mesokaha.
AITC-ni General Secretary, Abhishek Bannerjee antisani ja•mano NPP-ko bilsi 5 sason ka•ani report card ba kamrangko aro TMC-ni Meghalaya-na ming 10 ku•mikchetanirangko parakataha.
AITC tangkarangko on•na ku•chakenba, me•chikrangna We Card aro chadamberangna MYE card, jean tangka on•ani scheme-rang ong•achim. NPP-ni ku•rachakanirangara tangkako on•an baksa daka-rikani aro chadamberangna janggi tangani cholrangko tarina gita name chanchisamsoaniko ku•rachakaha.
NPP-ni niksamsoanirangara lak 5 kamrangko on•ani aro chadamberangna janggi tangani cholko on•ani, ge 6,500 songrangna, Village Community facilitator-rangni janggi tangani cholrangko on•ani, sorkario kam ka•na ge 1,000 CM Faciliation Centre-rang, FOCUS aro FOCUS+ Scheme-rang, block-o bading-chiwalaniko a•bachengdilgiparangna Prime Hub-rang, sorokrangko tarina Village Connectivity Scheme, kal•susaani bidingo daka-rikani, ge•e-game cha•ani bidingo dakchakani, dollongrang, airport, an•seng-baljokani aro pora-skiani bidingo tariani aro daka-rikanirang ong•a.
Ia ki•tapko Jrisalein Playground, Jowaio party-ni tom•anio oprake on•aha.
NPP-ni ki•tapo noksarangchi kam ka•anirangko aro namgnirangko man•giparangna talate on•aha aro iachin party-ni niksamsoaniko talataha. Uandake party-ni miksonganirang songsalo janggi tangenggipa manderangni nangnikanirangko on•na gita man•gen, uko mesokaha.
AITC-ni ming 10 ku•mikchetanirang, West Bengal-o a•bachengatgimin tangkarangko on•ani scheme-rang ong•a. AITC-ni bebe ra•ani gita ia scheme-rangan uamangko West Bengal-o election-rango chena dakchakani gimin Meghalaya-oba apsandake chena dakchakgen. Ia lekkao tangka koros ka•anirang barigen ine talatahachim, maina AITC tangkarangko sualani giminsan janapaha. Uni ja•mano sorkarini kajinako bariatna miksonganiko janapaha aro uandake pangkamgipa janggi tangani cholko chanchisoani ong•a.
Bajop Pyngrope NPP aro NPYF-ni Secretary “TMC-ni election-o ku•chakanirang bangbanggipa aro ong•na amgijagipa miksonganirangsa ong•aia. Uamang Meghalaya a•doko maming dingtangataniko ra•bana dingtangmancha chanchianide dongja. Uamangni chanchianirang Meghalaya-ni manderangna mande ra•ani gri aro uamang an•tangtangni ku•chakanirangko chu•sokatna man•gija, uamangna vote pu•onchina manderangko salna jotton ka•enga ine nikna gita man•a. “Bakki” Card-rangara uamangna pu•onchina tangka on•ani scheme-sa ong•aia aro uamang Meghalaya-ni kangal-chiolgri manderangko West Bengal-o gita TMC worker-rango sorkarini scheme-rango pangchakatna miksongenga. Meghalaya-o songdonggipa manderang re•anggipa bilsi 5-o nama sasonko nikna man•aha aro chinga uamangna namgipa cholrangko chu•sokate mesokangkugen” ine aganaha.
Unbaksana, NPP-ni agantimgipa aro East Shillong-ni candidate Dr Ampareen Lyngdoh TMC-ni miksonganirango indine aganchakaha, “TMC-ni miksonganirang tol•e ku•rachakanirang aro ong•na amgijagipa chanchisoanirang gapa. An•chingni a•doko chagrongenggipa neng•nikanirangko namatna man•gipa, cholrang uamango dongja. West Bengal-o uamangni daka gitan TMC Meghalaya-ko bilsi 30 ja•manchakatgen. Songdonggipa manderangna kattamangmang aro ong•na ampilgija miksonganirangna baten man•na kraa. Chingni miksonganirangara nikgimin kam ka•ako mesokgiminrang aro re•baenggipa bilsi 5-na niksamsoanirango pangchake tarigimin ong•a. Chinga chingni chanchisamsoanirango ka•donga aro a•dokni namgnina dontonggija kamrangko ka•anggen” ine aganaha.
Ia ge•gni dolrangni miksonganirang Meghalaya-ni manderangna baseani ong•a, mingsara jean silroro-namroroaniona name chanchisogimin aro minggipinara tangkako sualani gimin. Namedake chanchiesa kamko gadang gadang dake kam ka•anichi Meghalaya-ko dal•at-chuatna bilsi 4-5 nangnaba donga.
Minggipinara, sorkariko UPI payment gateway dake kajina gilna aro tangkarangko sualna jakkalani ong•a ineba janapataha.