Novembirth Marak re•benggipa election-o RPI doloni Chokpot elakkao susagen 

0

Tura, Nov 4, 2022: Re•baenggipa 2023 bilsini General Assembly Election-o Republican Party of India (RPI) Athawale (A) dolni South Garo Hills a•jani In-charge, Novembirth Ch.Marak 59-Chokpot elakkao RPI dolni candidate ong•e susaanggen ine parakataha.

RPI dolara India a•songni dolsa gitchamgipa Political party ong•a, ian gnigipa changna RPI doloni Garo Hills-o susana gita tarisoenga. Indake re•anggipa 2018 bilsio skanggipa changna Marbinruth Momin ia RPI doloni North Tura elakkao susaangaha.

Novembirth Marak, saksa chadamberangoni jat aro a•songna dakdike an•tangni u•ianiko aro miksonganiko A•chik jatna ba Meghalaya a•dokna an•tangko on•kange nama miksonga baksa re•mikkangenga ine parakataha.

Novembirth Marak batanggimin 2021 bilsini January 29 tarikdipet, pilak development-rango ja•man chakenggipa Chokpot elakkani manderangko gronge, kamrangko ka•na a•bachengaha aro Chokpot jolo songdongenggipa manderangni neng•nikaniko ma•sina gita man•aha. Meghalaya Assembly-o ge 60 seatrang gnang, uarangoni Garo Hills-o dam 24 Assembly Constituency-rang donga, uarangoni Chokpot constituency-ba ge•sa ong•paa, indiba maini gimin dilgiparang aro Meghalaya a•dokko sason ka•giparang Chokpot jolko galchipaenga, study ka•aha. Uni sandie nikani gitade, Chokpot jolo songdongenggipa manderangni mongsonggipa neng•nikaniranga skanggipa re•a doani rama jal•lang, gnigipa skie ra•ani skul aro kolej-rang, gittamgipa sanna banani hospital-rang namen ja•man chakenga ine nikna man•aha.

Meghalaya a•dokko man•chengani bilsi 50 gapaha, indiba Chokpot elakkao maming development-rang dongsrangja, uni a•sel Chokpot jolni manderang janggi tanganio namen neng•nikaniko man•tokenga ine aganaha.

“Bang•bata manderangan Chokpot jolko peculiar ine agantoka, indiba angni ma•siani gitade, Chokpot jolni manderang peculiar ong•ja. Dilgiparang namjani a•selsa manderang janggi tangna maming chol dongjae dilgiparangchi re•ange tangka paisarangko bi•e am•e ra•enga. Angni nikanio Chokpot jolni manderangan, gipin elakkani manderangna bate sontolbatgipa, kimkim ong•gipa aro bimchipgipa manderang ong•skaa. Uamang angna ka•sae, ang baksa bakrimenga aro angaba kangal nokdangoni ong•e, uamangna ka•sae apsan ku•monge kamrangko ka•na re•ongkatenga. Anga an•tangan kangal ong•e janggi tanggipa ong•ani gimin, duk satengtoenggipa kangal manderang aro angni ka•sagipa ma•a paarang, jong-ada, no-abirang aro chadambe ripengskarangna dangdike on•na an•tangko on•kangenga” ine Marak kobor ra•timgiparangna aganaha.

“Anga da•alo dilgiparangko chonnikna, uamangni kamko jaksi otna aro uamangni man•gniko ra•sekna re•baja. Indiba A•chik jatni duk mikchikko nike, maidakode neng•skime janggi tangenggipa Chokpot jolni manderangna cholko on•na man•gen, ia miksongaosa anga 59-Chokpot elakkao susaenga” ineba ua agandapataha.

Minggipin, “Mande ra•ako man•na kragipa, Skotong Minister Pa Conrad Sangma-ko anga party-ni gita mol•molatna sika. Meghalaya a•dokni dingtang dingtang sorkari department-rango ge 8000-na bate bangbang dongenggipa vacant postrango, man•na kragipa aro poraia skia donggipa chadamberangko nangni term bon•na skang appoint ka•e ba gapate on•pachina mol•molatpaenga. Unbaksana, angni ka•sara chadambe ripengrangkoba mol•molatna sika, na•simang an•tangtangni skia man•aniko skatang jakkale gimaatnabe, nama kamna jakkalna nanga. Anga an•tangni bil amadipet gipin dilgiparang baksa ku•monge chadamberangni gimin kamrangko ka•na aro cholko on•na gita ja•ku de•enga” ineba Novembirth Marak parakataha.

Leave A Reply

Your email address will not be published.