Novembirth Marak 2023 bilsini assembly eleksin-o Chokpot elakkaoni susagen
Tura, Oct 8, 2022: Re•baenggipa 2023 bilsini Assembly Eleksin-o Novembirth Ch.Marak, 59-Chokpot Elakkao jakgitele susagen ine parakataha.
Novembirth Ch.Marak-ni kobor ra•timgiparangna aganani gitade, Meghalaya Assembly-o ge 60 seatrang gnang, ua seatrangoni ge 24-de Garo Hills-o ong•a aro uarangoni Chokpot elakkaba ge•sa ong•paa, uko represent ka•na susagiparangoni angaba saksa ong•paenga. Meghalaya a•dokko man•chengaoni da•o bilsi 50 gapaha, indiba Chokpot jolo maming namdapani aro dingtangani dongkuja uni gimin, manderangni grapako nike, uamang baksa ku•monge kamrangko ka•angna gita re•chakatenga. “Anga ia 59-Chokpot elakkao saksa candidate ong•e re•chakatengon, sakgipin-ni mipalko aro man•gniko ra•sekna miksongja. Indiba A•chik jatni grapako nike uamangni mikchirangko ipakna aro an•tangni bil amadipet dangnike on•na gitasa re•hakatenga. Uni gimin Chokpot jolni ma•a parang, jong-ada, no-birang dilgipako baseanio namen simsakna nanggen, uni gimin an•tangni jaksiko maming saloba gongsa gonggnina pale cha•na nangja, jat aro a•songni namgnina miksonge dilgipako seokna nanga” ine Marak janapataha.
Uni candidate ong•e susanio minggittam miksonganirang baksa re•chakatenga, uaranga skanggipa skul, sana banani aro re•a doani rama jal•lang. Chokpot jolo namgipa skulrang dongjani a•sel, poraianio gisik nanggipa chadamberangko nambata gadango poraiatna chol man•jae, poraianiko dontongna draatako man•enga. Sana banani hospitalrang chu•onga gita dongjani a•sel sana bananio ja•manchakenga. Chokpot jolo re•a doani rama jal•lang namjani a•selba pilak kamrangon neng•nikaniko man•enga, iandakgipa neng•nikanirangko nike gisiko chakna amjae, an•tangni miksonganiko manderang baksa ku•monge on•gilpana sikenga ineba parakataha.
“Anga MLA ong•na skangan Chokpot jolo ge 5 Dildora English Skulko kulie on•gen aro ia skulrangko anga MLA man•jaoba oke ra•angpiljawa. Jemangan songni nokni manderang poraiani gadang dongachim, ia skulrango kam ka•e, an•tangtangni janggi tanganina gongsa gonggni dakchakaniko man•gen. Una agreba me•chikrangna ba•ra sikani (tailoring), atchal tariani aro cha•anirangko tariani cholko on•na gita traning centre-rangko ra•bana miksongenga” ineba Novembirth Marak an•tangni miksonge re•chakataniko parakataha.
Uasan ong•aigija, Rongrikimgre hanging bridge-ko RCC dolong kae on•na ja•ku de•gen. “Angna minister berth-ko nangjawa, MLA ong•ahaon, iarangko kam ka•na chu•onga. Bebe gita manderangni ka•sachi anga MLA seokako man•ode, Rongrikimgre hanging bridge aro Chokpot ramako tarina skanggipa ja•ku de•gen, uko dakna man•jaode jasani gisepon MLA-oniko resign ka•gen” ine Marak ka•kimchae, jolni manderangna janapataha.
“Na•a mai party-oni assembly eleksin-o susana miksongenga” ine kobor ra•timgiparangni sing•anina aganchakengon, “Anga da•odipet darang political doloba napkuja, jakgitelen susana miksongenga. Anga NPP, TMC, UDP, GNC party-o napoba uamangni projected candidate-rang dongahani gimin angna party ticket-ko on•jawa. Uni gimin anga kangal ong•e aro jakgitele susaanggen, indiba ja•mano national aro regional party-rang baksa chanchirimaniko daknaba donga, ukode ja•mano parakatgen. Anga tangka paisa bang•gipa MLA, MDC-rang aro gipin susaenggipa manderangko chonnikna, mitakna, uamangni kamko jaksi otna chakatenga ong•ja, indiba manderangni neng•nikan salo uamang baksa apsan ku•monge kamrangko ka•pana miksongesa anga Chokpot elakkao susaenga” ineba Marak parakataha.