Tura,March 6,2022: High Court aro NGO-rang Garo Hills-o niam gri rong•te aro a•ningni gamchatgipa bosturangko bikote badinganirangko nirok sandina nanga ine Tura-ni MDC Bernard Marak u•iataha.
West Garo Hills a•jani ning•o donggipa Pipulbari songo aro East Garo Hills-o niam gri rong•terangko bikotenga. Uana agreba, a•kawe jolo niam gri rong•terangko bikote gong 2500-ko “Gunda Tax” ka•e gile rong•terangko songsul Bangladesh a•songona watatenga. Rong•te gape salenggipa truk garirang challan gri Tura songjinmako walo napake re•enga. Ia bostu gape salgipa truk garirang ramarangko nosto ong•atenga, mongsongbate Tura-Dalu sorok ramarangko nosto ka•enga ineba ua janapataha.
Uasan ong•aigija West Garo Hills a•jani Civil Surgeon Office sepangoni Babupara gittimona dakanggipa sorokni jakasichipak naptomaniko nikna gita man•enga, iarang pilakan walo rong•te salenggipa garirang re•ani a•sel nosto ong•atako man•enga. Indakgipa kamrangko sorkari dontongatna nanga ine Bernard Marak didiataha. Uni gisepon ia kamrangko dontongatjagenchimode,High Court-sa bon•kamgipa bichal ka•ani ong•gen. Bading chiwalenggipa truk garirang maming challan gri aro dongimin niamna bate bosturangko gate salenga, indiba iarangko nirok sandina darang pulis dolba gri aro darangba iani bidingo nirok sandiani dongja.Indakgipa kamrangko ka•e man•ne cha•giparang, man•e cha•daproroenga, indiba indakgipa kamrang a•dokna chigana gimaaniko ra•baskaa.Iandakgipa kamrang sorkarina, bang•a revenue-ko gimaata aro mandeni jangginaba kenchakaniko ra•baa ine Marak janapataha.