Tura, Sept 27, 2022:Garo Hills-ni dolbri NGO-rang jekai GSU-CEC Tura, All India Garo Union (AIGU), Garo Hills Regional Unit, GSMC, HQ Tura aro All A•chik Youth Federation (AAYF), CEC Tura Sombar salo Gasbari gittimni gipin jat Gaonbura-ko ra•galchina dabie GHADC-ni CEM-na lekka sedoangaha.
NGO-rangni CEM-na seatgipa chittio janapatani gitade, Bhaitbari jolni Gasbari gittimo gipin jat Sokial SK-ko Gounbura songani a•sel, gipin jatrang A•kawe jolo donggipa A•chik songrango skatang napdrae songdong a•chaenga. Sokial SK an•tangni namgnina chanchie, Assam-oni katbagipa gipin jatrangna NOC on•ne Garo Hills-o songdongchina lekkarangko see on•enga. Indake bang•a Assam-ni gipin jatrang A•chik a•songo napdrae songdongna Gaonbura-ni Certificate-rangko man•ne, Garo Hills-ni A•kawe jolo donggipa Phulbari, Rajabala aro Shyamnagar GHADC elakkarango voter id-card-rangko tarie lekka pu•onna cholko man•enga ine u•iataha.
Indake ong•engon, A•kawe jolrango songdongkamgipa A•chikrang mikkangchina namen kensona nangani ong•enga ine janapatenba, Gasbari gittimni Gaonbura Sokial SK-ko ta•rake ra•galpilchina aro uko Gaonbura songpiltaijachina GHADC-ni CEM-ko NGO-rang Sombar salo gronge mol•molangaha.