Resubelpara, January 27, 2023: North Garo Hills a•jani NGO-rang AHAM Dainadubi Regional Unit, GSMC, A•chik Youth Welfare Association (AYWA), All A•chik Youth Welfare Society (AAYWS), Power Organization, North Garo Hills a•jani Deputy Commissioner-na lekka sedoate, 2018-oni 2022 bilsiona Kharkutta elakkao gimaenggipa SRWP project-rang aro gipin project-rangni bidingo ning•tue sing•sandianiko dakchina didiataha.
SRWP project-ko man•gipa beneficiary-rangni kam matchotkujaon, project-ni tangkarangko oke ra•aha. Iani project-ni bidingo NGO-rang RTI ka•e ma•siani gitade, MLA Rupert Momin-ni jonggipa ba gritang Jahangir Momin gong 1,10,95000 (kror sa lak chikkung hajar sotsku bonga)-ko kam matchotaha ine lekka tarienba oke ra•aha, indiba ua project-ko kam ka•ani maming chin dongja ine parakataha.
Kharkutta elakka-ni ning•o donggipa songrangna SRWP-ni gita bang•a project-rangko on•atgenchimoba ua project-rangko chu•sokate on•jaha. SRWP ni project-san ong•aigija, gipin bang•a project-rangba gimaenga, jeni bidingon chinga sing•sandianiko dakenga ine NGO-rang u•iataha.
Una agreba Beneficiary list-o biming nakatgiparang jemangan CGI sheet-ko man•na nangachim, uamang da•onaba man•kuja. Mitam Beneficiary-rangni biming bilsi gittam joljol nakatgenchimoba, uamang mamingkon man•jaha ineba janapataha.
Uni gimin, chinga NGO-rang maming kam ka•gija songni bimingo tol•e tangka oke cha•gipa manderangni kosako rakgipa ja•kuko de•angchina mol•molataha.