NGO-rang duko ga•akenggipa sima ari jolni manderangna dakchaktokpachina GH-ni manderangko mol•molata  

Tura, July 11, 2022: Re•anggipa March 29 tariko Assam aro Meghalaya a•dokni Skotong Minister sakgni Himanta Biswa Sarma aro Conrad Sangma Memorandum of Understanding (MoU)-o soi ka•grikani Assam a•dokchi man•enggipa A•chik songrangko man•bapilna gita Garo Hills-ni manderang dakchakgrimchina aro an•tangtangni bil amadipet on•gilpachina dolbri NGO-rang jekai ADE, FKJGP, AYWO aro FAF mol•molataha.

NGO-rangni parakata gitade, Meghalaya aro Assam sorkari dolgni MoU-o soi ka•ani Meghalaya a•doko ga•akgipa A•chik songrangko Assam a•doko chapatani gimin sima ari jolo dongenggipa manderang Garo Hills-ni NGO-rangko dakchakchina mol•molatahani gimin batanggimin somoirangonin Garo Hills-ni NGO-rang changni chang tom•anirangko ong•ate soi ka•gimin MoU-ko ra•galpilchina a•dokni Skotong Minister Conrad Sangma-ko mol•molahachim.

Indiba a•dok ge•nini Skotong Minister-rang soi ka•gimin MoU-ko ra•galpilna aro nipiltaina jechakaha. Meghalaya a•doko ga•akgipa A•chik songrangko Assam-o napatengani a•sel sima ari jolo donggipa manderang duk mikchirangko chakna nangenga ine NGO-rang janapataha.

“Chinga changni chang Skotong Minister aro a•dokni dilgiparangko mol•molaha. Indiba chingni mol•molaniko Skotong Minister Conrad Sangma knachakjaha. Uni gimin A•chikskani duk mikchi ong•ani somoio dakchakaniko on•na gita Garo Hills-ni manderang ja•ku de•na mangenga” ine ADE-ni President Dalseng Bira Ch. Momin parakataha.

A•dok damgnini gisepo soi ka•gimin MoU-ko nipiltaijagenchimode, Mallangkona jolo dongenggipa manderang jingjengatanirangko dakna gita ka•mikkenatahachim, indiba Skotong Minister Conrad Sangma mamingkon knachakjaha. Uni a•sel sima ari jolrango so•sojengjeng kajia golmal ong•anirang batroroenga aro Assam pulisrang ua A•chik songrangona re•ange dos gri manderangna bang•a nengnikanirangko on•enga ineba NGO-rang parakataha.