NGO-rang Dainadubi Fruit Processing Centre-ko PPP-na divert ka•ani gimin jegale jinma re•joma   

Resubelpara, Sept 13, 2022: North Garo Hills a•jani nangrimgimin NGO-rang GSU, ADE, FKJGP, AAYF, DCYO, AIJIF, DEO, Mothers’ Union, MKJDO aro gipin NGO-rang, Dainadubi-o donggipa, Fruit Processing Centre-ko Public Private Partnership (PPP)-na divert ka•e Tender on•ani gimin jegale a•dok sorkarini kosako namnikgijaniko mesokna Public Rally ba jinma re•jomaniko Monggolbar salo ong•atangaha.

NGO-rangni nangnike dabienggiparanga skanggipa Tender on•giminko ra•galpilchina, gnigipa Fruit Preservation Office-ko Dainadubi-o donpilchina, gittamgipa iani bidingo tangka paisa sera bera ong•aniko SIT-chi ning•tue sandianiko a•bachengatchina dabiangaha.

Indake a•dok sorkarini kosako jegale jinma re•jomaniona bang•bea skulni chatro chatrirang aro songni nokni manderang re•bae bakko ra•angtokaha.

NGO-rangni parakatani gitade, re•anggipa June jao iani bidingo a•dokni Skotong Minister aro dingtang dingtang Minister-rangna changni chang lekkarangko see Memorandum-ko on•ahachim, indiba a•dok sorkari da•alona kingkingba maming kamko ka•kuja ine u•iataha.

A•dok sorkari Fruit Preservation Office-ko namdapatna aro tang•doatna Office nokrangko rikdapgija Office-o kamrangko ka•gijan PPP-na divert ka•aniara jegalna nangchongmotgipa kam ong•a, ine NGO-rang parakataha.

Indakgipa sorkarini kamako maming dakeba North Garo Hills-ni NGO-rang aro songsongenggipa manderang ra•chakna man•jawa aro iako nidame dongjawa ineba NGO-rang parakataha.

Uni gimin, “Chinga a•dokni Skotong Minister Pa Conrad K.Sangma-ko dingtangmancha Garo Hills-o songdongenggipa manderangni namgnina chanchie iani bidingo kamko ka•atpachina mol•molatna sika” ine NGO-rang ku•rangko on•ataha.