Tura, April 16, 2022: Garo Hills-ni nangrimgimin dingtang dingtang NGO-rang jekai FKJGP-Garo Hills Zone, ADE, AYWO, Tura Garo Senior Citizens Forum (TGSCF), GGU, New Tura Development Forum (NTDF) adita salna skang tom•e chanchirimaniko dakenba a•dokni Skotong Minister Conrad Sangma-ni Memorandum of Understanding (MoU)-o soi ka•aniko jegale nipiltaianiko dakchina dabie re•baenggipa April 22 tarik Sukrobar salo dal•begipa tom•bimongani aro public rally-ko New Tura field ba Law College field-o ong•atna tik ka•angaha.
NGO dilgiparang kobor ra•timgiparangna aganani gitade, “An•ching a•dok sorkariko rikenggipa Conrad Sangma, a•dokni sima ari jolo dongenggipa West Khasi Hills aro Ri-Bhoi a•jani ning•o donggipa bang•a songrangko Assam a•dokna pakwataniara kraani ong•chongmotja aro ia kamko chinga raken jegala. Duko ga•akenggipa songni manderang changni changna chingna koborko on•atenba, na•songde chingko galchipjokma? Chingkode A•chik ine chanjajokma ine grape u•iataniko man•soaha. Uni gimin chinga Garo Hills-ni bang•a NGO-rang April jani 11 tariko duko ga•akenggipa songrangona re•ange nieaha. Unon chinga sq.km 16-rangni gita bang•a songrangko Assam a•dokna pakwataha ine u•ina man•aha. Chinga jinma apsan ku•monganiko dake re•baenggipa April 22 tariko salni 1 bajimango Tura Law Kolege-o dal•begipa tom•bimonganiko aro public rally-ko ong•atanggen. Chinga ia rally-ko ong•ate Skotong Minister Conrad Sangma-na memorandum-ko on•angjolgen, jedakode ua an•tangni soi kagimin MoU-ko nipiltaigen” ine FKGJP-ni President Pritam Arengh aganaha.
Unbaksana ADE Apex Committee-ni President Dalseng Bira Ch Momin, “Chinga batanggimin salrango sima ari jolo donggipa bang•a A•chik songrang jekai Mallangkona, Salbari, Maikuli songrangona re•ange chong•motgipa obostako ma•sie ra•na gita re•angaha. Assam a•dokna pakwatako man•gipa pilak songrang namnamgipa A•chik jatni songdong a•chaenggipa songrang ong•achim. Uamangni duk mikchi ong•e, ka•oksie grape dongenganiko nike anga ka•a chakna amja. Conrad Sangma an•tang A•chik ong•e jattangna ka•sagija dake jatskako indake kal•ake roaniara kraani ong•chong•motja. Chinga uni kamko raken jegala aro batanggimin salrango Mallangkona songona re•ange rally-rango bakko ra•angaha. Dilgiparangni dilsretanichi da•alo bang•a manderang duk mikchi ong•e janggi tangna nanganiona ga•akaha. Chinga Conrad Sangma-ni kamko jegala aro ua an•tangni soi kagiminko ra•galja dipet chinga jingjengataniko dontongjawa” ine aganaha. Uana agreba AYWO-ni President Sengbath Ch Marak” An•ching a•dokni sima ari jolrango so•sojengjeng ong•enganiko an•ching pilakan ma•sia ine anga bebe ra•a. Chinga re•anggipa April 11 tariko Mallangkona Salbari aro Maikhuli songona re•ange sing•sandianiko dakon, songni manderangko nike mikchi rakja. Re•anggipa March 29 tariko Memorandum of Understanding (MoU)-ko a•dokni Skotong Minister Conrad Sangma aro Assam-ni Skotong Minister Himanta Biswa Sarma soi ka•grikaha, ia MoU-ara an•ching A•chik jatnade bilongen namgijagipa aro ra•chakna man•gijagipa ong•skaenga. Ia obostani bidingo chinga Senior Citizens baksa Garo Hills-ni dingtang dingtang NGO-rang apsan chanchirime re•baenggipa 22 tariko Tura Law Kolege field-o tom•dake Skotong Minister Office-ona re•jomaniko dakenba uni soi ka•gimin MoU-ko jegalanggen” ine aganaha.
Uni gimin A•chik a•songo songdongenggipa pilak ma•gipa pagiparang, chadambeskarang aro NGO-rang Khasi Hills-o songdongenggipa A•chikrangni duk mikchi ong•e grapanina ku•rang on•pae, chakpaaniko on•an baksa jegalaniko dakaniona re•bae bakko ra•epachina sakantikon mol•molataha.