Resubelpara, August 13, 2022: Guwahati songjinmani Ukil saksa Kunal Kanti Saha Roy-ko Bristibar salo North Garo Hills a•jani Pulisrang rim•aha ine kobor man•aha.
Kobor man•soani gitade, ua Bajengdoba Pulis Case-o bak donggipa manderangna Court rai on•aha ine tol•e lekkao seenba Judicial Magistrate-ni seal aro soiko cha•ue manderangna on•aha.
Ia obostani bidingo Resubelpara Pulis Station-o badi ka•e mamlako segataha. Indake Resubelpara PS ia obostani bidingo IPC Section 465/466/467/471/472/34-o pangchake badi ka•aniko segataha. Badi ka•aniko segatani bakan pulisrang sing•sandianiko a•bachengataha.
North Garo Hills-ni Dakchakgipa (Deputy) SP-ni dakdilanichi NGH a•jani pulisrang Ukil Kunal Kanti Saha Roy-ni nokko chadrape sandianiko dakenba uni nokoniko ong•gijagipa Court Order-ko tarina jakkalgipa bosturangko man•aha.
Ukil Kunal Kanti Saha Roy-ko Pulis Custody-o donenga aro ia obostani bidingo talbate ma•sina gita sing•sandianiko dakenga ineba parakataha.