Shillong, December 6, 2021: Salgro Salaram a•dokni North East Students’ Organisation (NESO)-o bakrimgimin mongsonggipa dol 8 Students Organisation-rang jekai Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) aro All Arunachal Pradesh Students Union (AAPSU), Nagaland a•dokni Mon District-ni Oting songo Security Forces ba sipairangni ka•namgijagipa kamna jagokmanpile duk ong•an baksa raken jegalataha.
NESO-ni Chairman Samuel B.Jyrwa songbadna parakatani gitade, re•anggipa December 4 tarik Sonibar attamo Mon District-o donggipa Oting songni manderang kamtangtangoni noktangtangona bolero pick up ge•sao re•bapilengmitting somoio rang•gitik armed forces sipairang dos grigipa manderangko ka•saninggija chadrapanichi sak 13 manderang janggitangtangko gimaataha aro adita manderang saknaako man•ne jokkom ong•aniko NESO raken jegalataha.
Ia kenbegnigipa a•selrang batanggimin sal somoirangoba ong•angaha, armed security forces-rang bobil dake chakatgipa dolrangko sandie dos gri manderangko chanchichipe skatang rim•e ka•saninggija so•ote, doke sate, sasti on•ne roaha aro me•chikrangko kragija til•ekdrae nosto ka•aha, unbaksana da•alo dos grigipa ramram manderangko skatang chanchichipe goe so•otaha aro songni manderangko kenjagokataha.
Armed forces sipairang Salgro Salaram a•dokrango bobil dake chakatenggipa dolrangko am•sandianio kengni kamrangko ka•e uamang ka•namgijagipa aro rakbegipa niam Armed Forces Special Powers Act (AFSPA)-ko ra•gataha. Ia rakgipa niamko India sorkari bon•atna gita jechake, apsan niamko NE a•doko ra•gatangkuna chanchiaha. Ia niamara songdongenggipa dos gri ramram manderangna namen kenbegnigipa ong•a. Uni gimin manderang ia Act-ko bon•atna bang•a movement-ko dakaha, indiba India sorkari Salgro Salam a•doko tom•tomaniko nangnikjae apsan niamko rakkiangkue Salgro Salaram a•doko military-rangni bilchi indigenous manderangko sinjetna miksonganiko NESO jegalan baksa suk ong•gijaniko parakataha.
Indake ong•engon India sorkari AFSPA-ko ra•galna aro bon•atna nangchongmota ine NESO dabiangaha. Uni gisepon salgro salaram a•doko songdongenggipa manderangni namgnina aro nama bewalo namroro silroroaniko ra•bana man•jaode, salgro salaram a•dokni manderang apsan ku•monge rakbatgipa ja•kurangko de•e dabianiko dakangkugen ineba NESO-ni dilgiparang parakataha.