Baghmara, June 22, 2022: AITC dolni dilgipa Dr Mukul Sangma, South Garo Hills a•jaona re•ange Nongalbibra-ko nappake a•a rugipa aro chi bangipa biaprangko niangaha.
Mikka jimbee waanichi a•a ruani aro chi bannani a•sel sak 8 manderangni janggirang gimaaha aro sak ritcha-ni ritcha manderang nok gri jam gri neng•nikaniko man•tokenga.
A•dokko rikenggipa sorkarini dilgiparang obostako chagronge duko ga•akenggipa manderangna rakbate kamko ka•angna nanga. Uamang sorkarini dakchakanirangko bang•en nangengkua ine Dr Mukul Sangma aganangaha.
“Adita salrangna dongdipgija mikka jimbee waani a•sel South Garo Hills a•jani bang•a biaprangko chi sripaha, indake bang•a nokdangni manderang nokgri dongna nangaha. Uasan ong•aigija a•jani bang•a dollongrang jekon salantio re•ruraengachim, ua dollongrang nosto ong•aha. Chi bannani aro a•a rudapani a•sel bang•a manderang nokgri jamgri ong•a baksana nokni maming bosturangko man•rikjaha. Disaster Management Act, 2005-o pangchake sorkari duko ga•akenggipa manderangna chu•onga gita dakchakaniko on•na nanga. Matta bua man•gipa manderangko sanna banna gita re•na dona man•jae sa•dikako chakchike dongna ga•aka. Bijoli dongjani a•sel network-rang dongja, chu•gimik badita nokdangrang nosto ong•aha uko ma•sikujaenga, indiba songni manderangni talata gitade hajalni hajal songni manderang nokgri jamgri ong•e neng•nikaniko man•tokenga” ine Dr Mukul Sangma janapangaha.
Nongalbibra jolni dam 10 biaprang mikka waani a•sel bang•en nosto ong•aha. Songni mande saksa Dr Mukul Sangma-na aganengon, “Chinga mikka jimbee waani a•sel nok jam gri dongna nangengaha. Chinga ganding chinding gri, cha•a ringani gri, jakrara ong•tokaha. Chinga da•o dipetde songni gilja nok aro community hall-ko dongchakna ongipa noko dongenga. Indiba sorkari da•ona kingkingba maming dakchakanirangko on•kujaenga” ine parakataha.
South Garo Hills a•jani bang•a biaprang jekai Siju, Rongara unbaksana SWKH a•jani Maheskola aro Khalu songrang sorokrang nosto ong•e, bajar antirangko chi sripe gimikni gitan nosto ong•ako man•aha.
Koborna u•iatani gitade, a•a rudapani a•sel saknaako man•ne dongenggipa sakgni manderangko Siju PHC-o donenga, nambata sanna bannaniko uamangna on•pana gipin biapchi ra•angna gitaba ramarango a•a rudapani gimin be•gruangaha ineba u•iataha.
Rongara aro Siju songrangona nangani bosturangko ringrango sokatenga, indiba chu•onga gita sokatna man•jaenga. Siju-ni bang•a dokkanrango cha•ani ringani bosturang bon•changaha ineba u•iataha.
Maheskola aro Khalu songrangona sildoreng gitasa bosturangko sokatna man•gnok. Uamango cha•ani mirong mangmangba dongjaha ine knasoaha. Uamangna je cholchiba chu•onga gita bosturangko sokatna jotton ka•na nanga. Obostarangko nike aro sorkarini ja•manchake kam ka•anirangna Dr. Mukul Sangma, ” Ongaigen ine ku•sikchi agannede kamko chu•sokatna man•jawa. Duko ga•akenggipa manderangna ta•raken dakchakanirangko sokatna nanga. Uamangko ka•dimeatna ta•raken kamko ka•na nangchongmota ” ine Dr Sangma didiataha.