Shillong, Jan 5, 2023: India a•songni dingtang dingtang biaprango Kristianrangni kosako ong•gija dakanirang batroroengani gimin, BJP dolko matnangna jotton ka•engon, Meghalaya a•doko BJP dol jat ba torom basegija aro.mikkang nitegijan ma•mong sorkarini on•enggipa scheme-rangko pilakni namgninan suale on•enga ine Meghalaya BJP parakataha.
Congress dolchi sason ka•enggipa Chattisgarh a•doko Kristianrangni kosako kragija dakani gimin, Meghalaya Pradesh Congress Committee (MPCC)-ni padot Vincent Pala-ni matnanganina a•dokni BJP dol talatskaha.
Chattisgarh a•doko Congress dolsa sason ka•enga aro Kristianrangni kosako ong•gija dakanina ku•rang on•ahani gimin, BJP dol Vincent Pala-ko mittelatskaha. Kristianrangni kosako ong•gija dakanina ua pangnan BJP dolko matnangronga, ine Meghalaya Pradesh BJP, Media department parakataha.
BJP-ni miksonge dongipa, “Sabka Saath, Sabka Vikas”-ni gimin janapatengon, BJP darang jat ba toromna mikkang niteani gri kamrangko ka•enga, ine Meghalaya BJP parakataha.
BJP dolni mikkang nitea gri kamko ka•anichi Meghalaya a•doko lak 2.5-na bate game cha•gipa nokdzngrang bilsiprako gong 6000 tangkarangko an•tangtangni account-o man•soaha. Unbaksana, lak 1.5-na bate nokdangrang chi pipe sale on•ako man•aha. BJP sorkarini ning•o Meghalaya a•doko nokdang ge 60-na bate nokrangkoba man•aha. Meghalaya a•doko ia namgnirangko man•gipa bang•bata nokdangrangan Kristianrang ong•a. BJP maming dakeba sorkarini namgnirangko on•anio torom.baseani dongja ine Meghalaya BJP parakataha.
Re•anghipa Sombar attamo Chattisgarh a•doko Kristianrangko aro gilja nokrangko kragija nosto ka•e galani gimin, suk.ong•gijaniko parakatenba, Chattisgarh a•doko Congress dolan sorkariko chalaienga. Uni gisepon Congress, BJP-kosa matnangskaenga ineba Meghalaya BJP janapatskaha.