Tura, Feb 9, 2023: Re•baenggipa Assembly election-o susaenggipa dolgni political dolni manderang doltangtangna chakgrike re•anggipa Monggolbar walo Phulbari elakkani ning•o donggipa Charbatapara songo TMC-na kam ka•enggipa mande saksani noko tom•aniko ong•atmitting somoio NPP-na kam ka•enggipa manderang walni 10:30 bajimango chadrape saksa Nozrul Hoque-ni nokko nosto ka•aha ine u•iataha.
Saknaako man•gipa Nozrul Hoque-ni parakatani gitade, “NPP-na kam ka•gipa dolsa manderang, angni nok sambaona re•bae go•ol aro ro•ongrangchi chadrapenba angni noko donggipa chokkirang, table-rang aro wa•ani berarangko nosto ka•e galangaha. Uamang ro•ong aro itta-rangchi goruruaha” ine janapataha.
Ua somoio Shyamnagar-ni MDC Habibuz Zaman-ni nok sepango dongdipe, una kam ka•gipa manderang ro•ong goanichi TMC-na kam ka•gipa sak 4 manderang saknaako man•aha.Bilonge saknaako man•gipa Nozrul Hoque-ko bakan Phulbari CHC-o sanna gita ra•angaha ine u•iataha.
Ia a•selni bidingo Charbatapara songni saksa Nozim Hussain chadrapgipa manderangni kosako badi ka•aha.
Nozim Hussain-ni badi ka•gipa lekkao janapatani gitade, Habibuz Zaman aro una chakgipa manderang baksa jinma re•jomaniko dakenba, uni nok sambao dongdipe, Nozrul Hoque-ni nokko ro•ong goaha, jeon sak 4 manderang saknaako man•aha.
DEO-ni report gitade, Habibuz Zaman aro una chakgipa manderang Charbatapara songko re•angmitting somoio adita sak TMC-na chakgipa manderang uamangni scorpio gariko nanggakatani bidingo indakgipa a•sel ong•aha ine u•iataha.