Tura, Dec 1, 2022: Re•anggipa November 22 tariko West Jaintia Hills a·jani Mukroh songo a·sel ong·anichi Garo Hills-o ong·atna manchisogimin Me·gong Festival-ko a•dok sorkari dontongatpilani ja·mano ia apsan dakgipa program-ko dingtang bimango ong·atskanaba donga ine parakataha.
Me·gong Festival-o dingtang dingtang dokkanrangko dakna sengsoenggipa aro dingtang dingtang program-rango bakko ra·na am•enggipa manderang korosrangko ka•samsoani ja·man Budbar salo, Garo Hills-ni adita sak dilgiparang, a·dokni Skotong Minister Pa Conrad K Sangma aro North Tura-ni MLA Pa Thomas A Sangma-ko grongenba, Me•gong Festival-ni bidingo kobor ra·timgiparangna parakataha.
Skotong Minister-ko grongdilegipa FAF-ni gitcham dilgipa Sengrak D Marak-ni kobor ra·timgiparangna parakatani gitade, Me·gong Festival-ni palo dingtang program-ko ong·atanio sorkari maming jak dongjawaha, indiba manderang nangnikengani giminsa dingtang bimango ong·atskachina Skotong Minister pakwatataha.
“Chinga skanggipa Skotong Minister-ni agan-ku•patitimgipa aro North Tura-ni MLA Thomas A Sangma-ko grongeani ja·man, Skotong Minister Conrad Sangma-ko gronge, ia festival-ko ong·atani bidingo agangrikaha aro ia program-ko dingtang bimango event management baksa nangrime ong·atna gita chingna pakwatataha. Uni gimin ia program-ko chinga manderangni nangnika gita dingtang bimango ong·atna tik ka·aha, indiba da·o event management baksa agangrikengkua. Haida salbongani gisepon, chinga ia program-ni gimin talbate u·iatna man·na ka•dongenga, indiba ia program-o sorkari maming bak dongjawaha” ine Sengrak Marak parakataha.
Sengrak Marak-ni parakata gitade, Garo Hills-ni bang·a manderang ‘Michael Learns To Rock’ (MLTR)-ni git ring•aniko nina ka·donge nisengsoengani gimin MLTR dolko rimbana jotton ka·enga, indake re•baenggipa December 12 tariko MLTR-ko Garo Hills-ona re·bapilani chol dongenga. Ia program-ko December 12 aro 13 tarikrango apsan Baljek Airport-o ong·atangnaba donga.
“Ia program-o Garo Hills-ni dingtang dingtang mingsing minggamgipa dokna dam•na changgipa dolrang, jekai Riprap, Rough Road, Da Suraka aro uandakgipa dolrangko nikna gita man·gen aro chingni ka·dongsoani gitade MLTR dolba December 12 tariko re·bae gitrangko ring·anggen,” ineba parakataha.
Jaintia Hills a·jani Mukroh songo a·sel ong·ani ja·man a·doko ong·atenggipa pilak festival-rang, program-rang aro manianirangko a•dok sorkari dontongataha aro Garo Hills-o dal·batsranggipa mingsa ‘Me·gong Festival’-koba dontongatpilahani gimin dingtang dake ong·atskana miksongenga.