Shillong, April 18, 2022: Assam aro Meghalaya a•dokni sima ario ong•enggipa kajia golmalko namatna dam 12 songrangoni dam 6-ko Skotong Minister Conrad Sangma “Give and Take Policy” o pangchake pakwataniko Khasi Hills Autonomous District Council (KHADC) raken jegalataha.
KHADC-ni Chief Executive Minister (CEM) Titosstarwell Chyne Robibar salnio, “Mandeni a•kange register ka•gimin a•arangko sorkari maming dakeba gipin a•dokna pakwatna man•ja. A•kanggimin a•arango sorkarini maming bak dongja aro ua a•ao je kamko ka•atna skangba sorkari Council-ni raiko ra•chengna nanga ine Right to Compensation and Land Acquisition and Rehabilitation and Resettlement Act, 2013-ni Section 41-o janapani gnang. Meghalaya a•dok sorkari Council-o sing•cheng sanchenggija maming dakeba a•arangko pakwate on•na man•ja. Assam a•dokni a•arang Revenue Land-sa ong•ani gimin sorkari a•ani bidingo je raikoba on•na man•aia. Meghalaya sorkari jinma baksa maming chanchirimani gri Memorandum of Understanding (MoU)-ko soi ka•aha. Ia obostani bidingo Regional Committee, Council baksa a•bachengani somoio mangmangsan chanchirimangaha” ineba parakataha.
Sima ari jolo donggipa songni dilgipa Hima-rang Council-na bang•a chittirangko seataha aro Conrad Sangma-ni MoU-ko soi ka•ani ja•manoba aganchakanirangko nangnike sedoataiaha. Uamangni sing•anirangna chingo maming aganchakani dongja, maina Conrad Sangma MoU-ko soi ka•na skang chingna maming dakeba kobor on•jaha ineba ua agandapataha.
KHADC-ni membor-rang aro MoU-ko jegalgipa Hima-rang Sombar salo ia obostani bidingo chanchirimaniko dakanggen ine u•iataha.