Shillong, May 23, 2022: Shillong songjinamao gital rikenggipa Meghalaya Legislative Assembly Building Central Dom mikka jimbee waanichi May 22 tarik Robibar pringwalni 1 bajimango be•gropaha.
Ia obostani bidingo ning•tue sandianiko dake contractor-ni kosako raka ja•kuko de•na nanga ine manderang bang•a social media-rango jangtokengaha.
Ia Assembly buildingko re•baenggipa November ba December jao nokdonggaaniko dakna a•dok sorkari manchisoengachim, indiba rasong gribee, nokdonggana skangan be•gropaha.
Pilsagita rasong gnange darangba ia a•sel ong•anio saknaako man•jaha, indiba maibakae nokdonggani somoio be•gropgenchimode, bang•a Minister-rang, MLA-rang aro Officer-rangni janggirang gimanaba dongachim, indiba mandeni chanchisoaniko Nokgipa Isol-an dingtangataha ineba manderang agantokenga.
Ia Assembly building-ko rikgipa contractor-ko sorkari ta•rake rim•na rim•na nanga aro Executive Engineer-ko kam suspend nanga ineba manderang bang•a social media grouprang jing•jangtokengaha.
Maini a•sel ia Assembly Building be•gropna nanga, ma building rikna changgijagipa contractor-sa rikama ine bang•a manderang dingtang dingtang social media-rango sing•doaniko daktokenga.