Tura, April 11, 2022: GSU CEC ni President Zikku Balgra N Marak, Meghalaya aro Assam a•dokni sima ari jolo ong•enggipa kajia golmalko namatna ine CM-ni ja•ku ga•e Meghalaya a•dokni ning•o ga•akgipa bang•a songrangko Assam a•dokna pakwataniko raken jegala ine aganaha.
“Bang•a songni manderang changni changna Assam a•dokni aro Meghalaya a•dokni sorkarina chitti rangko, memorandum rangko seatahachim indiba uamangni ku•rangko sorkari knachakja. Assam a•dokna pakwata man•gipaoni song damsa Malangkona, Meghalaya a•dokko man•chenga oni West Khasi Hills a•jani ning•o Nonglang,Sordarship jurisdiction ni ning•o ga•aka. CM bang•a songrangko maming sing•cheng sanchenggija Assam a•dokna ‘Give and Take Policy’ o pangchake pakwataha. Conrad Sangma aro Himanta Biswa Sharma,songni manderangni duk mikchiko maming dakeba dal•e ra•jaha uamang an•tangtangni namgnina rikstape ‘BORDER’ ingipa kattakosan dal•e ra•iaha. Chinga Garo Students Union Central Executive Committee ni membor rang uamangni kamko raken jegala aro a•doktangni a•ako jaksi-sa gita mangba Assam a•dokna on•jawa. Chinga duk o ga•akenggipa A•chik jat rangko watgaljawa,chinga uamang baksa dukni somoio cha•dengpae ka•dimeaniko on•an baksana uamang baksa ku•rangko on•pagen” ine Zikku Balgra N Marak aganaha.