Tura, April 20, 2023: South West Garo Hills a•jani Damalgre Pulis Station-ni ning•o ga•akgipa Balalgre songo ma•sina man•gijagipa me•asa saksani manggisiko, Tura aro Garobadha soroksam buringoniko April 18 tarik pring 10:30 bajio man•aha.
Pulisrangni koborna parakani gitade, bilsi 35 mang ong•gipa sigimin manggionilo man•gipa lekaarango seani gitade, Rengsangre-o donggipa Diren Sangma sagini depante, Prodip T.Sangma ong•achim.
Pulisrangni man•gipa lekkarango segipa mandeni mahari ma•drangko sandioba, maming sakkiko man•jaha aro sigimin manggisiko darangba ra•anggipa dongja ine South West Garo Hills a•jani SP u•iataha.
Maharirang darangba ua manggisiko ra•anggipa aro sandigipa dongjachim. Indake ong•oba Rengsangre songni me•chikma saksani u•iatani gitade, ua Prodip Sangma ong•ja, Prodip Momin-sa ong•achim. Ua bilsi 30-na skangan, Rengsangre songni me•chik saksako jikgipa ra•e, gale katangaha aro sakgipin me•chikko ra•taiaha. Uni atchiram song Damas joloni ong•achim, ineba u•iataha.