Tura, April 11, 2022: Bang·a Meghalaya a·dokni NGO- GSU, ADE, AYWO, NTDF, TGSCF, KSU aro Dolloy dolni memborrang Malangkona songona jinma re·ange tom·bimonganiko ong·atangaha.
Ia tom·bimonganio uamang pilakan Skotong Minister Conrad Sangma ni kamko jegalangtokaha. “Give and Take Policy” o pangchake sima ari-ni kajia golmalko namatna ine ja·ku ga·aha ong·ode maina Meghalaya a·dokni a·arangkosan Assam a·dokna pakwatenga, Assam a·dokni a·arangkode Meghalaya a·dokde maming dakeba man·dapa gri ine NGO dolni saksa dilgipa singdoangaha. Conrad Sangma an·tangni namgnina dos gri A·chik jatni songrangko gipin a·jana pakwataha, uni kamko chinga raken jegala ineba ua agandapaha.
Tom·bimonganio bon·kamao NGO-dolni dilgiparang aro Malangkona songni manderang “A·atangko darangnaba pakwatjawa” ine jinma melie ku·mitcheta gnang chrikangaha.