Shillong, April 2, 2022: Meghalaya aro Assam a•dokni sima ari jolo donggipa songni manderang Sonibar salo uamangni a•arangko Assam a•dokna pakwataniko nangnikjae sorkarini kosako jegalaniko dakangtaiaha ine u•iataha.
Sima arini kajia golmalko namatna ine a•dokni Skotong Minister-rang Monggolbar salnio New Delhi-ona re•ange Agreement-soi ka•aha. Indiba Survey of India-ni gita sima ariko name nirok sandie a•arangko tona re•bakuja aro Parliament of India-ni segimin agreement-na soi ka•aniko man•kuja ine parakataha.
Indake ong•engon, Ri-Bhoi a•jao ga•akgipa Maikhuli songni manderang uamangni songo donggipa pokkriko Assam a•dokna pakwataniko jegale jingjengatanirangko ong•atangaha.
“Skotong Minister je kamko ka•na skangba songni manderango sing•cheng sanchengna nangachim, uni srik mitinno kam ka•ako chinga ra•chakna man•jawa ine lekkarango see jingjengatanirangko dakangaha. Chingni ka•a be•e mol•molaniko knachakjagenchimode chinga ia mamlako Supreme Court-ona ra•doanggen” ine parakataha.
Maikhuli songni manderang Jirang MLA Sosthenes Sohtun aro MDC Victor Ranee-ni kamrangkoba raken jegalangaha.