Tura, March 23, 2022: Meghalaya a•dokni Skotong Minister Pa. Conrad Sangma re•anggipa budget session-o parakatani gitade, Ri-Bhoi district-o donggipa Maikhuli song aro uano sondonggipa manderangni na•tok jilenggipa digi ba fishery-ko Assam a•doko chapatengani gimin Maikhuli songni manderang raken jegalataha. Maikhuli songni headman ba Nokma Pa Kleden Sangma-ni kobor ra•timgiparangna aganani gitade, re•anggipa 1985 bilsio Assam a•dokko sason ka•gipa AGP-ni chasongoni ia kajia golmalrang a•bachengaha.
Indaken ua bilsirangonin Ri-Bhoi district-ni ning•o donggipa Maikhuli song sepangchapo donggipa Pilingata songko chu•gimik Assam sorkari ra•sekangaha.
“Apsandake ia bilsioba Meghalaya a•dokni Skotong Minister Conrad Sangma changsaba Maikhuli songona re•baa dongja aro songni Nokma, songni manderang aro Shyiemship baksa mamingkoba sing•cheng sanchenggija an•tangni sika gita Maikhuli songko Assam a•doko chapatna mai bil donga, ua saksa skotong minister ong•e, indakgipa neng•nikanirangko namatnasa nangachim” ine Kleden Sangma aganaha.
Skangonin Meghalaya sorkari Maikhuli songna maming development-ko on•jaha. “Skang British-ni chasongonin ia Maikhuli songko Sixth Schedule on•aha, uni gimin iano songdong a•chaenggipa manderang bachi katgen. Songtangko wate chinga darangchiba katjawa aro songtangko wate darangnab on•jawa chinga raken dakgrikaigen” ineba aganaha.
“Unbaksana chingni a•ao Assam sorkari pulis out post-ko rikdraahani gimin chinga high court-o petition on•aha, indake high court-ni rai on•ahani giminsa uamang dontongaha. Uandake chingni gopram-koba rak•sekaha, mande gopna on•gija Assam pulisrang chingko champengaha, indaken pusrang baksa jegrikaona sokronga, indiba high court, Maikhuli songni manderang bachi mande gopgen inenba rai on•ahani a•selsa Maikhuli songni gopramo mande gopna man•enga” ine songni headman aganaha.
Indakgipa neng•nikanirang aro sinjetaniko man•ne janggi tangenga, Maikhuli songni manderang da•alo Conrad Sangma-ni kamko jegale tom•aniko ong•ata baksana jimaniko re•jomaniko ong•ataha. Re•anggipa bilsio deputy chief minister Preston Tynsong Maikhuli songni manderangna maming kobor on•gija sruk sruk walni 7 bajio re•bae sima ariko niangaha. Ua somoio songni pulis saksa angna call ka•ate kobor on•ani gimin anga walo re•angaha, indake uamang joljol gopram sambaona re•ange sima ariko walosa niangaha. Uamangni indake walo sima ariko nina re•baniara cha•una re•baama, ma mai dakna miksonge sruk sruk re•baa, cha•ugipa manderangsa walo cha•una rorama. Indakgipa sorkarini kamko chinga raken jegala aro ra•chakna man•gijani ong•a. Sima arini kajia golmalko namatna miksongode, salosa re•bae sima ariko nina aro sing•sandina nangachim ineba songni headman aganaha.
“Conrad Sangma maini gimin ia Maikhuli songko aro chingni na•tok jile cha•enggipa digi ba fishery-ko Assam a•dokna on•atenga, ua an•tangba Maikhuli songko skangonin Meghalaya-ni a•asa ine ma•sia. Indiba uni gisiko maiba man•gni dongani giminsa “give and take policy”-ko jakkale Maikhuli songko Assam-na on•atenga. Chinga uni kamko raken jegala aro ra•chakna man•jawa, chinga sipileba Maikhuli songko Assam-o chapatna on•jawa aro raken dakgrikaigen. Chingni songko maming dakeba Assam-na on•jawa, skangoba Pilingata songko Assam sorkari nokrangko rikpetpetani ja•manode chu•gimikon ra•sekaha. Indiba chingni Maikhuli songko Assam-na on•chongmotjawa. Chingna Meghalaya sokarini maming development-ko on•jaoba, chinga an•tangtangni bilchi tangka paisa gile ramarangko tarienba songdong a•chaenga aro Meghalaya a•doko voter Id-card-rangko man•pae songtangon Meghalaya a•dokni candidate-rangna vote pu•onenga. Uni gimin Maikhuli songko aro iano donggipa digi aro gopramko maming dakeba Assam a•dokna on•jawa aro” ine Maikhuli songni dilgiparang aganaha.
Conrad Sangma saksa A•chik ong•e, A•chik jatko aro Meghalaya a•dokko gipin a•dokna palna nangja, batesa ua Meghalaya-ni a•arang, songrangko gipin a•dokni ra•sekdraengon chel•chaknasa nangachim, indiba Conrad Sangma-de Meghalaya a•dokni a•arang aro songrangkon gipin a•dokna on•atskaenga, iara dilgipani kamna kraama. Conrad Sangma-ni kamko niatgenchimode, mandeni janggi tanganiko aro a•doktang chigatangko gimaatgipasa ong•a ine Maikhuli songni manderang suk ong•gijaniko parakataha