Mallangkona, May 17, 2002:West Khasi Hills a•jani sima ari jolo songdongenggipa A•chik songrangko Skotong Minister Conrad Sangma Assam a•dokchi chapatenba, re•anggipa March 29 tariko Assam-ni Skotong Minister Himanta Biswa Sarma baksa, Union Home Minister-ni mikkango Memorandum of Understanding (MoU)-o soi ka•e on•ahani gimin, sima ari jolo songdonggipa A•chikrang so•sojengjeng duk mikchi ong•e, grapna nangengaha.
Indake ong•engon, Mallangkona songni manderang, Mallangkona Area Development Organisation (MADO) aro Mallangkona Joint Action Committee (MJAC) dolko bikote, ia obostani bidingo ja•kurangko de•e dakgrikna a•bachengaha. Indaken Khasi Hills aro Garo Hills-ni NGO-rang baksa changni chang tom•anirangko ong•ate dingtang dingtang ja•kurangko de•e, Skotong Minister Conrad Sangma-ni kamko jegalenba, MoU-ko nipiltaichina mol•molangaha.
Indiba Skotong Minister Conrad Sangma iani bidingo mamingkon knachakgija dongengani gimin MADO-ni Vice President, Enosh Momin aro gipin dilgiparang May 17 tarik Monggolbar salo Shillong songjinmaona re•ange, KHADC office-o Advocate Robertjune Kharjahrin-ko grongani ja•mano joljol Mawshynrut-ni MLA Jigur Myrthong-ko grongenba sima ario neng•nikaniko nirokatpachina mol•molangaha.
Mallangkona jolni manderang skang Meghalaya a•dokko man•chengaonin, Meghalaya a•doko songdonge, eleksin, id card, job card aro ration card-rangko man•ne, Meghalaya sorkarini on•enggipa pilak namgnirangko man•engachim. Indiba jensalo NPP sorkari rikaha, “Conrad Sangma Chingko Assam a•dokchi ga•pake galataha. A•bachengo Conrad an•tangan manderangni namnikako ra•esa jekoba kamko ka•gen ine ku•rachakachim, indiba da•alo maina chingko Assam a•dokchi watatskaha. Chinga maming saloba Meghalaya-ko wate Assam-chi re•angjawa, chingko Assam a•doko kal•steke rognok. Uni gimin Conrad Sangma an•tangni soi ka•gimin MoU-ko nipiltaina nang•a aro kam ka•na changjaode, Skotong Minister-ko watna nanga” ine duko ga•akenggipa manderang ka•a chakna amjae, bikara sokja dake, Conrad Sangma-ni chanchigija an•tangni sika gita kam ka•e, an•tangni namgnina A•chikrangko chaktogija obostao galonne duk mikchi ong•ataniko NGO-rang aro Mallangkona jolni manderang raken jegalataha.