Tura, Feb 13, 2023:Dalu elakkao susaenggipa Republican Party of India (RPI)-Athawale (A)-ni candidate Panseng R.Marak aro gipin sak 6 Association-ni manderangko re•anggipa 2019 bilsini December 2 tariko koila badinggipa Dharambir Singh, tol•e Gaauapara Pulis Station-o badi ka•aha ine koborna u•iataha.
Panseng Marak-ni u•iatani gitade, Dharambir Singh ong•gija dake Assam-oniko koila salgija Jadi joloniko salbaani gimin Association-ni manderang sing•sandina Gasuapara-o dongdipatani gimin, Gasuapara pulis station-ona re•ange, “Angko rim•srukna ba kidnap ka•na am•enga” ine tol•e Case No.05/2019, under section (u/s) 448/440/506/363/511 IPC-o pangchake badi ka•aha.
Ia case-ni bidingo mija eleksin-na nomination file ka•ani salo sandiani gimin mesokaha ine Panseng Marak u•iataha.