Shillong, March 12, 2023: Meghalaya-ni Football Team adita salrangna skang Riyadhni King Fahd International Stadium-o March 4 traiko ong•atanggipa chang 76-gipa National Foot Championship Hero Santosh Trophy-o Silver Medal aro Kamala Gupta Trophy-ko cheani itihasko tariaha. A•dokni ong•bachengaoni ian skanggipa changna Meghalaya Football team mingsinggipa Santosh Trophy-ni final round-na kal•susaanio cheaha ine u•iataha.
Skotong Minister Pa Conrad Sangma Meghalaya Team-ni indake namgipa itihasko man•anina nama sikaniko on•ataha.
Sonibar salo Saudi Arabia-ni Riyadh-o ong•atanggipa kal•susaanio Meghalaya 2-3-ko chipe Karnataka-chi ama cha•aha.
All India Football Federation (AIFF) aro Saudi Arabia Football Federation-ni gisepo MOU-ko soi ka•ani ja•mano gitchambatgipa national championship-ni semi-final-rang aro final kal•susaanio skanggipa changna a•songni a•palo ong•ataha.
Meghalaya Team-ni re•bapilaniko rimchaksona Department of Sports and Youth Affairs, Road Show-ko ong•ataha, jeon flag-off ceremony-ko Mawlai Madan Heh-o salni 2:30 bajioni a•bachenge, Jaiaw Jingthangbriew, Jaiaw St Joseph, Jaiaw Langsninh, Jaiaw Pdeng, Mawkhar Main Road, Motphran, Police Bazaar, AG’s Office, Additional Secretariat, Barik, Malki Point, Dhanketi, Don Bosco Square, Laitumkhrah Beat House-ona soke re•angaha aro Flash Mobrang ba dakmesokgipa dolrang biap damdoko dakmesokanirangko dake bon•kame Fire Brigade Ground-ona attamni 5 bajiona mande ra•aniko dake tom•aniko dakaha.
Sak 50 bike salgiparang, chriktimgiparang aro Emcee-rang tom•aniko dilgiparang chegipa dolrangko ia road show-ko re•dilaha aro kal•susagiparangko rasong chaatna gita jilla gimikko okamataha. Ia manianio Strait Brothers aro Gracel Ropmay git ring•e an•saoatangaha. Minister of Sports and Youth Affairs, Government of Meghalaya-ni Shakliar Warjri aro MFA-ni President Larsing Ming, katchae nama didianiko jinmana parakanaha. Government Cash awards Scheme-ni gita kal•susaanio chegiparangna tangkarangko boksis on•angaha, aro kal•susagipa dolrang soi ka•gimjn jersey-ko robol baksa Department of Sports and Youth Affairs-na on•aha.
Chegipa dolrangna mande ra•aniko dakengon, Minister of Sports and Youth Affairs, Shakliar Warjri, “Mikkangchi, Meghalaya-ni pilak kal•susagiparang Meghalaya Football Team-ni chu•sokaniko nike, didianiko dake, ia chu•sokaniara uamangoni chel•ja ine chanchianiona re•bagen ine anga ka•donga. Ia kal•susagiparangan nama dakmesokaniko mesokgiparang ong•a, jemangan na•simangko rake kam ka•na didianiko aro chu•soksrangaona sokna sorkari na•simangna bil ama dipet dakchakaniko on•gen. Meghalaya-ko kal•susaanio nama bimingko ra•bana aro a•doko donggipa changa sapanirangko namdapatna Meghalaya sorkarini mongsonggipa miksongani ong•a. National ba International gadangoba ong•china, Meghalaya-ni kal•susagiparangko uamangni nambatgipa gadangona sokatanian chingni niksamsoani ong•a” ine aganangaha.