Shillong, April 11, 2023:Mawhati-ni gitcham MLA aro HNLC bobil doloni an•tangko bame on•gipa, Julius K Dorphang-ni kosako Meghalaya High Court, bilsi chu•ongkugijagipa me•chik dambeko tilekani mamlao bilsi 25-na pattoko donataha. Maina ua me•chik dambeni mikkangchi name janggi tanggniko nosto ka•e ong•siatani gimin songsalni mikkango ba manderango kema bi•na nanga ine Court rai on•aha.
Dorphang dosi dongchongmota ine Nongpoh POCSO Court 2021 bilsini August 24 tatiko pattoko donataha. Uko pattoko chipatanina uni Ukil High Court-o jamin-na jotton ka•ahachim, indiba dosni dakani kri Court uko pattoko donchina rai on•aha.
Uko April 5 tariko High Court bichal ka•ani gitade, “Ia mamlako bon•atanide, manderangni ka•sachakanio pangchakgen. Maina duko ga•akgipa me•chik kratcha•atako man•genchimoba me•chikni dol bichalni salo mamingkoba rake agandapjaha, indiba baditan ua me•chikna kratcha•beani aro aiao inmanpilgipa obosta ong•ahachim” ine Court parakaha.
Indake ong•engon, High Court-ni division bench baksa Chief Justice Sanjib Banerjee aro Justice Wanlura Diengdoh-ni paraka gitade, darangba uko bichalni salo dos dakani kri janggi tanga gimik pattoko donatana nanga ine Dorphang-ni kosako agandapa dongja.
Uni gimin, ua me•chik bilsi 25 gapkuja dipetna, uni mikkangchi janggi tanganina a•dok sorkari nirok simsakaniko dake namgniko on•anggen aro uko kratcha•ata baksana man rasi be•atanina gong lak 20-ko mature ong•kujana kingking on•anggen. “A•dok sorkari duko ga•akgipa me•chikna gong lak 5-ko compensation gamgen aro unbaksana gong lak 15-ko dai gama man•gen” ine Court parakataha.
“Chu•gimik gong lak 20-ko ua me•chikni bimingo a•dok sorkari jagittamni gisepon, on•ate, janggi tanganio nirok simsakaniko dakanggen. Tangkako ta•rake on•atjawa jedakode, duko ga•akgipa me•chikko darangna togina aro je mandeba, uni man•gniko jako ra•na kam ka•na man•jawa, ua me•chikna agrede” ine Court raiko on•angaha.
Court-ni ge•eta gita dai gamna nangako Dorphang gamjaode, mikkangchi bilsi 5-na pattoko dongdapna nanggen ineba Court parakataha.