Tura, February 5, 2023: Garo Students Union (GSU) Western Zone Dadenggre, James Pangsang K Sangma-ni agangipa kattarangko raken jegalataha.
GSU Western Zone-ni President Tengsan M.Marak-ni u•iatani gitade, James Sangma eleksin campaign-o Dadenggre-ni mitam NGO-rang, Dadenggre Civil Sub-Division-ko District-ona ra•doaniko nangnikjaenga ine aganaha.
“James Sangma-ni agangipa kattarangko chinga GSU raken jegala. Badia NGO dolrang NPP Dadenggre Block-ni President-ona re•ange Dadenggre District-ko nangnikja ine memorandum-ko on•eaha, uni bidingo talataniko on•na nanga. Chinga NGO-rang 1989 bilsionin Dadenggre Civil Sub-Division-ko District songe on•china dabienga. Ia dabianiko chinga NGO-rangsan ong•aija, indiba Dadenggre elakkani pilak manderangan dabienga. Uni gisepon a•ja songako nangnikja ine agangipa kattarangara tol•anisan ong•aia” ine GSU-WZ-ni President Tengsan M Marak u•iataha.
James Sangma, eleksin campaign ka•mitting somoio, Raksamgre aro Tikrikkila jolni manderang Dadenggre baksa chapna sikjaenga ine aganprakaha. Uni gimin, chinga badia dol aro badia manderang, indakgipa kattarangko aganaha, uni bidingo talataniko on•na nangchongmota ine GSU dabiangaha.