Shillong, December 17, 2022: India a•songni Prime Minister Narendra Modi Robibar salo Shillong songjinmaona re•baenba North Eastern Council (NEC)-ni Golden Jubilee maniao bakko ra•anggen.
North Eastern Council (NEC) sak 10,000 manderangko Shillong Polo Ground-o Narendra Modi-ko rimchaksogen ine East Khasi Hills-ni DC Isawanda Laloo parakataha.
NEC-ni bilsi 50 gapaniko Polo Ground-o jinma maniangan baksana a•dokni State Convention Centre-o Official Meeting-ko ong•atangjolgen.
North Eastern Council-ko 1972 bilsini November 7 tariko Shillong songjinmao bikotaha, indiba obostarangni a•sel Golden Jubilee-ko manina December jaona ra•doatna nangaha.
Ia manianio NEC-ni pilak membor-rang, Union Home Minister, DoNER Minister, North East a•doknini pilak Governor, Skotong Minister, MP, MLA-rang aro NEC-ni nominated ka•ako man•gipa membor-rang, State Chief Secretary-rang, Central-ni seokako man•gipa Chief Secretary, North East a•jani Senior Officer-rang, bang•a gipin Officer rangko bakko ra•epachina okamataha.
Ia tom•aniona North East a•dokni pilak Self Help Group-rang, Achiever-rang aro Citizen-rangko bakko ra•echina gitaba u•iataha.
Indake Robibar salo PM Narendra Modi bang•a Project-rang jekai IIM-ni gitalgipa Campus, NEC Project, Meghalaya State Project, unbaksana bang•a Foundation Stone-rangko songangjolgen ine parakataha.