Shillong, July 18, 2022: India a•songni MP aro MLA-rang Sombar salo a•songni 15-gipa President-ko seokangtokaha.
Indake ia changni eleksino Santhali jatni saksa Droupadi Murmu, BJP dolni dakchakaniko man•ne BJP dolni gita susangengon, Yashwant Sinha, warachakenggipa dolni dakchakaniko man•ne eleksino susaangskaha.
Meghalaya a•dokni MP aro MLA-rang Rilbong-o donggipa Assembly Building-o vote pu•onangtokaha. Meghalaya a•doko NPP-chi sorkari rikenggipa
Meghalaya Democratic Alliance (MDA) Tribal candidate Droupadi Murmu-na vote-ko on•nanggen. Indake ong•engon TMC dolni MLA-rang warachakenggipa dolni candidate Yashwant Sinha-na vote pu•onangskagen ine u•iataha.
Indiba, Meghalaya a•dokni mitam MP aro MLA-rang ia eleksino bakko ra•angjawa ineba u•iataha.Re•baenggipa July 21 tariko New Delhi-ni Parliament House-o changen, uandake July 25 tariko gital President a•songna dangdike on•na ku•mitchetaniko dakangskagen ine u•iataha.
MP-rang an•tangtangni vote-ko tangsim rongni ballot lekkao on•anggen, uandake MLA-rang pink ballot lekkao on•angskagen.Dingtang dingtang ballot rongni lekkao vote-ko pu•onanichi, Returning Officer-rang, MP aro MLA-rangni vote-ko channa altugen.
Uandake Election Commission, MP aro MLA-rangna vote pu•onna gita dingtangmancha violet inkni penko tariataha.
Presidential Eleksin-ni Elektoral Kolege ning•o Lok Sabha aro Rajya Sabha-ni membor-rang, a•dokni Legislative Assembly-ni membor-rang, Union Territory-rang jekai Delhi, Puducherry aro Jammu and Kashmir-ni Legislative Assembly-ni membor-rang gnang.
Meghalaya Assembly-o sak 60 membor-rangni vote value-ara 1020 ong•a. Uandake MLA-rangni vote value-ara 17 ong•skaa. MLA-rangni vote value-ko 1971 Census-o pangchake a•dokni population-o pangchake on•aha.
Draupadi Murmu ia eleksin-o chegenchimode, ian Tribal jatrangni gisepo skanggipa President ong•gen ine u•iataha.
Meghalaya a•doko sakgni Tribal Candidate-rang President eleksino susaangaha. Meghalaya a•dokni skanggipa Tribal Candidate aro Lok Sabha-ni gitcham Deputy Speaker, George Gilbert Swell, 1992 bilsio President-ni eleksino susaangaha. Indiba rasong gribee Congress candidate Shankar Dayal Sharma cheaha. A•dokni gnigipa Tribal Candidate, Purno A•gitok Sangma 2012 bilsio BJP dolni dakchakaniko man•ne President eleksino susaangahachim, indiba rasong gribee Congress candidate Pranab Mukherjee cheangskaha.