Tura, May 10, 2022: West Garo Hills a•jani gitchambatsranggipa Hawakhana Petrol Pump jekon AOC ine ma•sitokachim, re•anggipa May 1 tariko petrol pump-ni kuturi ge•sao kenbegnigipa wa•al chagopaha. Indiba Uamang wa•al chagopani bidingo darangnaba u•iatjaha. Maina petrol pump sepang jolrango donggipa nokrang aro to chipna senge dongenggipa bang•a manderangna kenbegnigipa wa•al chagopani bidingo maming mikrakatskaniko on•jaha ine koborna u•iataha.
Ia obosta ong•miting somoio mikrontangchi nikgipa manderang pulisna koborko on•eaha.
Indake May 9 tarik Sombar walo WGH a•jani pulisrang Hawakhana Petrol Pump-ona re•ange sing•sandianiko dakan baksana uamangni kobor man•sogipa chong•mot ong•ama, ong•ja uko ma•sina CCTV footage-rangko nina gita ra•angaha.
“Chinga pulisrangna Hawakhana Petrol Pump-o kam ka•giparang ua a•selni bidingo maming koborkon u•iatjaha. Indiba chinga gipin manderangni ku•sikkoniko koborko knaskaha. Chinga Petrol Pump-o kam ka•giparango sing•sandian baksa uamangni agangipa kattarangko see jote ra•rikaha” ine WGH a•jani Superintendent of Pulis (SP) VS Rathore u•iataha.
WGH a•jani Fire and Emergency Services Department-ni manderang wa•al chagopani ja•pangko sandianggen ineba u•iataha.
Uasan ong•aigija Hawakhana Petrol Pump-o to bregipa manderangna cha•boke torangko rue on•enga ine bang•a manderangni matnanganikoba chinga man•soaha ineba SP u•iataha.