GSU Zikzak Unit, SBI Zikzak branch-na gital rikenggipa buildingko den•galpilchina SBI-ni AGM-na lekka sedoanga 

0

Amapati, June 1st, 2022:Garo Students’ Union (GSU) Zikzak Unit, Sombar salo Tura Chandmari-o donggipa State Bank of India SBI, Regional Business Office (RBO)-ni Assistant General Manager (AGM)-na lekka sedoange Zikzak SBI branch-na Pronob Saha-ni biapo gital building rikaniko dontongatchina ba ra•galpilchina dabiangaha.

GSU Zikzak Unit-ni ma•siani gitade, SBI Zikzak branch-na dam komie nok parako on•na gita building gital rikna re•anggipa 2021 bilsini March 3 tariko tender notice-ko The Shillong Times aro Salantini Janera-o chappa ka•atako niksona man•aha.

GSU Zikzak Unit-ni President Teseng D. Sangma aro General Secretary Silman M.Marak-ni songbadna kobor on•atani gitade, ua somoio gnigipa changna covid sajinma giprorotaiani gimin songbad bregipa aro songbad poraigipa manderang komiachim ua somoiosa songbado chappa ka•ataha. Uni a•selo chingni u•ianiba namen ja•manchakrikaha. Sing•anide, Pronob

Saha maikai Songbad-rango ua kamna tender on•enga ine ma•siaha aro sawa una dingtangmancha kobor on•aha. SBI Zikzak branch-na gital buildingko rikna gita SBI Zikzak branch-ni notice board-o maming tender notice on•na dongja aro branch Manager an•tangba iani bidingo mamingkon ma•sijaha ine GSU dilgiparang parakataha.

SBI Zikzak Branch-ni Manager-na maming u•iatani gri sawasa songbadrango chappa ka•atskaha ine GSU sing•doangaha. RTI ka•anina Zikzak branch Manager-ni aganchakgipa Ref. No BM/2022-2023/RTI-1/Dated:05.05.2022-o u•iatani gitade, tender galgipa sakgittam donga, skanggipa Pronob Saha, gnigipa Raju Marak aro gittamgipa Zikzak Magurmari songni Opason Koch ong•achim.

Uamangoni sakgni tender galgiparang Raju Marak aro Opason Koch-mangde tender galja aro uamang tender galani bidingo mamingkon ma•sipaja ine Teseng Sangma parakataha.

Indide, uamangni biming maikai list-o nakataha ine GSU sing•doangkuaha. Maina Public Information Officer (PIO)-ara tol•e chingna u•iatskaha, uamang tender galronggipa manderangba ong•ja, uamang tender galgenchim ong•ode, maina chu•gimik lekkarangko on•gija voter Id-card mangmangko on•skaha. Tender galanio bang•a dingtang dingtang lekkarangko on•chapna nanga. Unbaksan form ANNEXURE ‘A’ aro ANNEXURE ‘B’-o sawa tender gala nokgipani bimingo soi ka•aha ineba sing•dodapangkuaha.

Maina bil gnanggipa an•tangan chingna aro da•o dongenggipa SBI bank-ni building nokgipana challakki dake togiaha. Iani bidingo bank building nokgipana SBI bank-ko ra•jitanggnok ine bank-ni bil gnanggipaoniko maming koborko ma•sojaha ineba u•iataha.

Da•o je biapon SBI Zikzak branch-ko chalaienga ua building nokgipaan skanggipa SBI Zikzak branch-ko rabae uamangni buildingko tarie on•chenggipa aro Zikzak-o bank-ko a•bachengdilgipa ong•a. SBI Zikzak branch-ko 1984 bilsioni da•ona apsan buildingon bank-ko chalaia bilsi 38 gapaha. Ia buildingni nokgipao bang•a a•arang donga, buildingko rugale apsan biapon gital building nokrangko rikdape jakkalna man•gen.

Pronob Saha-ni a•ana bate da•o SBI branch-na jakkalenggipa building sambaon nanga ong•ode bang•en biaprang donga, gari donchakna aro gipin nangarangna jakkalna man•genchim.

Saha-ni chonbegipa a•ao gari ge•sakoba donchakna biap dongja. Ua a•ara pagipasagi Prangopal Saha-ni 2006 bilsini September 19 tariko lease patta tarie donanggipasa ong•a. Meghalaya Land Transfer (Regulation) Act, 1971-ni gita ia act ja•mano 1972 bilsioni gipin jatrang lease patta-ko tarina man•jaha, ong•jaode ua lease pattako den•galnaba donga.

Iani bidingo,sandianiko dakchina chinga GHADC-ni bil gnanggipa Land and Revenue Department-na lekkako seatgen ineba Teseng Sangma parakataha.

Unbaksana Saha-ni a•ao SBI branch-na building rika ong•ode mikkangchi bang•a neng•nikaniko man•gen. Uni gimin, “Chinga Prinob Saha-ni a•ao building gital rikna on•giminko ta•rake den•galpilchina aro da•o dongenggipa building nokgipana on•pilchina mol•molna sika. Ian chingni miksonge dabiani ong•a” ine Teseng Sangma janapataha.

Leave A Reply

Your email address will not be published.