Tura, June 1, 2022:Dadenggre-ni MLA aro Health Minister James Sangma bilsi 5 ong•piloba an•tangni Dadenggre elakkana maming dingtanganiko aro namdapaniko ra•bana man•jaha ine GSU Western Zone (North) Dadenggre parakataha.
Dadenggre-ni manderang pangnan Dadenggre-o dingtanganiko nikna sike MLA-ni kamko nisengsoengachim, indiba maming dinganiko ra•bana man•jaha.
“Anga Dadengre-o songdongenggipa manderangni namgnina, MLA James Sangma-ni kamrangko parakatna sika. James Sangma aro NPP dolni MDA sorkari chu•gimik bilsi 5 gapaha, indiba maming mingsakoba chu•sokata dongja. Kakketko agangenchimode, chinga gisik ka•tong gimikchi una ka•donge kamko ka•aha. Indiba da•o ong•enggipa MDA sorkari bilsi 5 sorkariko rikahaoba ua an•tangni Dadenggre elakkana maming mingsakoba dake on•a dongja. Dadenggre jolni manderang una vote pu•onachi ua bilko aro ministrial berth-ko man•aha, ua uko gualna nangjachim” ine GSU-WZ (N) Dadenggre-ni President Tengsan M.Marak suk ong•gijaniko.parakataha.
GSU WZ Dadenggre, changni chang Memorandum-rangko aro gisik ra•atpiltaianirangko dakaha, indiba ua mamingkon knachakjaha.
“Chingni bi•aniko ua pangnan bikpilronga, indiba chinga mingsao ka•dongkuenga, uan Dadenggre Civil Sub Division-ko chu•gimik District-ona ra•doe on•anian uni skanggipa kam ong•enga. Una agre gnigipa dabianiara Degree Arts Kolege-o Science aro Commerce stream-ko ra•gate on•china ru•uta sal somoirangoni dabienggipa ong•a” ineba Tengsan Marak janapataha.
Una agreba, “Chingni sorkario dabiani Dadenggre, Civil Sub Division-ni skotong song ong•a, indiba Women Pulis Cell ba Pulis Me•chikrangni Cell dongkuja aro basakoba nanggittikani salrango Dadenggre Pulis Station-o Pulis Me•chikrangni Cell dongjae me•chikrangni mamlao neng•nikaniko man•a. Unbaksana Dadenggre jolo namgipa ringani chirang dongjani gimin PHE Water Supply-ko on•china gitaba dabiaha, indiba da•alona kingkingba a•bachengate on•kuja” ineba janapataha.
Ia dabianirang gimikan Dadenggre jolni manderangna mongsonggipa ong•a, uni gimin joltangni MLA-ko aro a•dok sorkariko Dadenggre jolo songdongenggipa manderangni palo, manderangni namgnina gisik ra•atpiltaianiko GSU WZ on•attaiaha. Uni gimin local MLA James Sangma kosako janapatgiminrangni bidingo nirokatpachina Tengsan Marak didiataha.