Baghmara, June 9, 2022: South Garo Hills a•jani Gasuapara Rongsigre Govt LP Skul nok namsrangjani gimin, GSU Gasuapara Regional Unit, Education Department-ko ta•rake taripile on•china didiataha.
GSU Gasuapara Unit-ni Secretary Harmithstar R.Marak-ni u•iatani gitade, Gasuapara blockni ning•o donggipa Rongsigre Govt LP Skul nokni obosta namen namsrangjaha. Ia skulo salanti songni bi•sarangko skul ka•chakenga. Indakgipa skul noko bi•sarangko skul ka•aniara bi•sarangna namen neng•nikani ong•a aro bi•sarangni gisiko nange skie ra•aniko ka•dongani gri ong•ata ine janapataha.
Uni gimin, district administration aro education department Rongsigre Govt LP Skulko ta•rake nirokatpachina GSU Gasuapara Unit mol•molataha.