Tura, May 13, 2022: Garo Students’ Union (GSU) Centre Executive Committee (CEC), Tura-ni President Tengsak Momin-ni dailachi Garo Hills-ni dingtang dingtang GSU-Zonal-rang baksa Sukrobar salo GHADC-ni gital CEM, Albinush R.Marak-ko gronge memorandum-ko on•angaha.
GSU-ni parakatani gitade, GHADC-o da•ona kingkingba Separate Electoral Roll-ko tarikujaengani gimin, gipin jatrang GHADC eleksino susana aro vote pu•onna gita man•enga. Tribal manderangna on•gimin Sixth Schedule-ni niamo maming dakeba gipin jatrang eleksino bak ra•na aro vote pu•ona man•ja.
Indiba GHADC-o Separate Electoral Roll-ko tarikujaengani giminsa gipin jatrang tribal manderangni nokdringo nape eleksin susana cholko man•enga ine GSU-ni seatgipa memorandumo janapataha.
GSU dilgiparangni CEM-ko grongeanio janapangani gitade, ru•utbea bilsirangoni dabienggipa, Codification of Garo Customary Law (GCL) ba A•chik jatni Niam Retti-rangko tarichina, GHADC-o gipin jatrang susana aro vote pu•onaniko champengate A•chik jatna dingtangmancha Separate Electoral Roll (SER)-ko GHADC-o tarie on•china aro GHADC-o kam ka•giparangna jaanti dormaharangko on•china dabie segimin memorandum-ko on•angaha.
Indake ong•engon, GSU-CEC-ni Assistant General Secretary Salman D.Sangma-ni u•iatani gitade, GHADC-ni CEM-na mande ra•aniko ba felicitation-ko GSU-ni gita dakna miksonganiko parakatjolaha.