Tura, July 16, 2022: GSU CEC-ni dabianirangko chu•sokatkujaengani gimin re•anggipa July 4 tarikoni sima ari dongija Tura NEHU Campus-o office picketingko dakengon July 7 tariko GSU dilgiparang baksa NEHU Vice Chancellor vedio conference ka•e July 14 tariko Tura NEHU Campus-ona re•bae chanchirimaniko dakgen ine ku•rachakatahani gimin jingjengataniko July 7 tariko dontongatahachim.
GSU President Zikku Balgra N.Marak-ni parakatani gitade, NEHU Vice Chancellor July 14 tariko NEHU Campus Tura-ona re•bagen ine July 7 tariko ku•rachakatahani gimin GSU jingjengataniko dontongataha.
Indiba GSU-ni dabianirangko saldok (6)-ni gisepo chu•sokatchina NEHU Vice Chancellor-na somoiko on•ataha, indake ong•genchimoba NEHU Vice Chancellor ku•rachakatangko chu•sokatjaha aro Tura-ona re•bajahani gimin GSU-CEC July 15 tarik dipet Tura NEHU Campus-o jingjengataniko a•bachengattaiaha ine u•iataha.
Jena kingking Vice Chancellor ku•rachakatangko chu•sokatja aro Tura-ona re•bae dabianirangko chu•sokatna chanchirimaniko dakkuja dipetna jingjengataniko dontongjawa ine GSU-CEC-ni President Zikku Balgra N.Marak parakataha.
GSU-ni mongsonggipa dabianiranga,
Skanggipa Account Assistant Registrar-ko appoint ka•china. Gnigipa, full fledget Pro Vice- Chancellor-ko appoint ka•china. Gittamgipa, NEHU Tura Campus-o kam ka•giparangna, Equal pay for equal work-ko on•china. Brigipa, NEHU-ni Degree Certificate-rangko Tura NEHU Campus-o on•china. Bongagipa, NEHU Paper-ko Re-evaluation ka•china dabiahachim. Uni gimin ia dabianirangko chu•sokatja dipet jingjengataniko dontongjawa ineba parakataha.