Tura, April 21, 2022: Garoland State Movement Committee (GSMC) HQ Tura, Tikrikilla Regional Unit, Raksamgre Unit, Pedaldoba Unit, Bajengdoba Unit aro Jengjal Unit-ni dilgiparang, Budbar salo Meghalaya aro Assam a•dokni sima ario donggipa songrangko Assam-chi chapatani a•sel so•sojengjeng ong•enggipa Mallangkona songona re•ange duko ga•akenggipa manderangko grongenba tom•aniko ong•atangaha.
Meghalaya aro Assam-ni skotong minister sakgni re•anggipa March 29 tariko Delhi songjinmaona re•ange Ministry Home Affairs-ni Minister Amit Shah-ni mikkango Memorandum of Understanding (MoU)-o soi ka•e, Meghalaya-ni a•arang aro adita songrangko Assam a•dokna pakwatatani bidingo sima ari jolo donggipa manderang duk mikchi ong•e, Conrad Sangma-ni kosako jegalaniko dakenba MoU-ko nipiltaichina dabiengon, GSMC dolba duko ga•enggipa songni manderangna chakpae, pilak dakgrikanirango apsan ku•monge kamko ka•angna ku•rachakangaha.
Conrad Sangma skotong minister ong•oba, a•ani nokgipa ong•ja. A•ani nokgiparango aro songni manderango sing•chenggija, an•tangni namnika gita a•arangko a•dok gipinna pale cha•na bil dingja. Sixth Schedule a•jarangko district council aro Sordarship, Shyiemship, Doloishiprangsa a•ani nokgipa ong•a, sorkari maming dakeba skatang pale cha•na man•ja. Ia songrangko nirok simsakgiparang Sordarship, Shyiemship, Doloiship aro A•king Nokmarang gnang. Uamango sing•gija maina MoU-o soi ka•na nanga.
“Chinga 1972 bilsioni da•alona kingking Meghalaya a•doko songdongenga, pilak man•gnirangko Meghalaya sorkarioniko man•enga aro eleksin id-card-rangko man•ne vote-rangko pu•onenga. Indide Conrad Sangma maina chingko Assam-chi watatenga. Chinga maming saloba songtangko wate Assam-chi re•angjawa, soi ka•gimin MoU-ko nipiltaina nanga” ine songni me•chikma saksa grape aganangaha.
“Skotong Minister a•bachengode, songni manderangni namnikaniko ra•esa kam ka•gen ine ku•rachakachim. Indide da•alo nang•ni ku•rachakgipa kattarangko gualjokma. Na•a saksa A•chik dilgipa ong•e, jattangni grapako nina sikama. Chinga an•chiko on•gen, indiba chingni a•ako Assam-na on•jawa aro chinga Meghalaya-on songdonggen” ineba me•chikma agandapangkuaha.
“Na•a A•chikni an•chi ong•ode, jattangna ka•sagen aro MoU-ko nipiltaigen. Ia jolo songdongenggipa manderang saobade nang•ni mahari ma•drang, mama ada, ma•de ma•jong aro jonga grian ong•engnaba donga. Mikkangchi nang•ni dedrang su•drang bano songdonggen, uko chanchiesa kamko ka•na nanga. Ong•jaode, Meghalaya a•dok bon•gnok. Uni gimin chinga GSMC-ni gitaba Conrad Sangma-ni kamko raken jegala aro duko ga•akenggipa songni manderangna gipin NGO-rang baksa ku•monge kamko ka•anggen” ine GSMC dilgiparang ku•monganiko on•angaha.