Tura, Oct 23, 2022: Bilsianti manirongbaenga gita Tura-oni km 35 mang chel•ao donggipa Gondenggre songo donggipa A•chik Songsarek-rang Sukrobar-oni Sonibar salona Wangalani tom•tome matchotangaha.
Ia wangalani-o bang•a manderang re•ange bakko ra•angaha aro dingtang dingtang kolege-ni chatro chatrirang A•chik jatni dakbewal, rikbewalrang, doka dam•anirangko sing•sandina ba Research ka•na gita re•angtokaha. Unbaksana Nagaland a•dokni GSU, Nagaland Garo Tribal Council (NGTC)-ni dilgiparang Gondenggre Wangala-ona re•bae A•chik jatni dakbewalrangko Research ka•na gita re•baha.
Chasongni chasongna A•chik Ma•gitcham Pagitchamrangni ripingbaenggipa dakbewalrangko da•onaba Gondenggre songni A•chik songsarekrang daksninge ripingkuenga. Ia wangalani skanggipa salo pattigipa ra•rongipa, Misi Saljongko mittele una chu rugale maninangaha. Gnigipa salo Sasat So•e, pattigipa ra•rongipa misi saljongko kusi ong•e watatpilaniko dake maniangaha.
Indake ia A•chik jatni dal•batgipa wangalani salo A•chik Songsarek-rang kusi ong•e, wak matchu doke chu ringe, cha•e ringe, chrok mesae Wangalaniko dakangaha.
Garo Hills-ni dingtang dingtang ning•tugipa songrango bang•a A•chik Songsarekrang jatni dakbewal rikbewalrangko wangale ripingkuenga. Indiba badiaba songrango biapni kri wangalaniko dakgija dingtang manianiko dakskaenga.