Gipin jat saksa Muslim ma•chongoni Garo ma•chongona de•jitaniko GSMC jegala 

Tura, May 30, 2022:Bilsi 22 ong•gipa gipin jat saksa Goalpara a•jani Krishnai Guria Pt-1, PO, PS Krishnai songo donggipa Nur Islam-ni depante, Osman Goni an•tangko Islam torom-oni Kristian toromo nape an•tangko Garo mahariona Osman Goni Marak ine Affidavit ka•e de•jitaniko Garoland State Movement Committee (GSMC) HQ, Tura raken jegalataha.

“Chinga A•chikrang gipin jat Muslim ma•chongoni Garo Ma•chongona de•jitaniko raken jegala aro ra•chakna man•jawa” ine GSMC HQ Tura-ni Organizing Secretary Jason Tekrang M.Sangma parakataha.

Badia Garo ma•chongni ge•etaniko ba permission-ko man•ne, ua gipin jat A•chik ma•chongko de•na man•aha. Indiani dal•batgipa Katchari ba Supreme Court-ni rai on•gmn niam gita, je gipin jatan an•tangko tribal ine togie Affidavit ka•e Certificate-rangko taria, uade India a•songni niamko pe•ani ong•a. Beben ua Islam torom-oni Kristian torom-ona an•pile bebe ra•aniko champengja, indiba ua an•tangko Garo ine tol•e Affidavit ka•aniko A•chik jat ra•chakna man•chongmotjawa ine Jason Tekrang Sangma janapataha.

Da•alo bang•a gipin jatrang an•tangtangni man•gnina badiaba A•chik me•chikrangko jik kime A•chik Mahari de•mike A•chik a•songni gam jinko ra•seke katenga. Uni gimin bil man•gipa official-rang iandakgipa obostarangko sandie action ra•na nanga ine GSMC dabiangaha.